وشوناتھ کوریڈور میں کام کر رہے دو مزدور کی موت، 8 زخمی

وزیر اعظم نریندر مودی کے پارلیمانی حلقہ بنارس میں منگل کے روز صبح پیش آئے ایک حادثے میں دو مزدور کی موت ہو گئی جبکہ آٹھ مزدور زخمی ہو گئے۔ یہ حادثہ کاشی وشوناتھ کوریڈور کی خستہ حال عمارت کے گرجانے سے پیش آیا۔

یہ واقعہ منگل کی صبح پیش آیا۔ زخمی مزدور عارف مومنین نے بتایا کہ رات میں ڈیوٹی کرنے کے بعد سونے کے لئے گوئنکا لائبریری کی جانب گئے تھے۔

گرمی کی شدت کی وجہ سے عمارت کے نیچے ہی 10 مزدور سو رہے تھے، اسی دوران ایک خستہ حال عمارت گر گئی جس میں دو مزدور کی موت ہوگئی، جبکہ آٹھ زخمی ہو گئے۔

سبھی مزدو مغربی بنگال کے بتائے جارہے ہیں۔ اس پورے معاملے کی تفصیلات وزیراعظم نریندر مودی نے خود لی ہے۔

بنارس کے ڈسٹرکٹ مجسٹریٹ کوشل راج شرما نے ٹویٹر پیغام میں لکھا کہ وزیر اعظم نریندر مودی نے فون کر کے مجھ سے اس معاملے کے بارے میں جانکاری لی اور ہر ممکن مدد پہنچانے کی ہدایت دی ہے۔