اونٹوں کی قربانی کی قدیم روایات

بنارس میں لوگ چندہ کرکے مشترکہ طور پر اونٹ خریدتے ہیں اور قربانی کے بعد پورے علاقے میں گوشت تقسیم کیا جاتا ہے۔ یہ قربانی عید الاضحی کے دوسرے دن کی جاتی ہے۔

ریاست اترپردیش کے ضلع بنارس کے مسلمانوں میں قربانی کا جذبہ ملک کے دیگر علاقوں کے مقابلے زیادہ ہے۔ یہاں پر لوگ نہایت خلوص کے ساتھ قربانی کرتے ہیں اور عید الاضحیٰ کے موقع پر کثیر تعداد میں قربانیاں کی جاتی ہیں۔

بنارس میں بکروں، بھیڑوں اور بھینسوں کی قربانی کے لیے کوئی مسئلہ نہیں ہے اور نہ ہی کسی طرح کی اجازت کی ضرورت پڑتی ہے۔

ان جانوروں کے علاوہ بنارس کے مختلف علاقوں میں پانچ اونٹوں کی قربانی بھی دی جاتی ہے۔

بنارس میں اونٹوں کی قربانیاں عام نہیں ہے جبکہ بنارس سے متصل مؤناتھ بھنجن نام کا شہر ہے یہاں پر عام طور سے لوگ اونٹوں کی قربانیاں پیش کرتے ہیں۔

بنارس میں عیدالاضحیٰ کے پندرہ، بیس دن قبل ہی اونٹ آجاتے ہیں اور مقامی لوگ اچھی طرح سے دیکھ بھال کرتے ہیں۔

اس سلسلے میں جب مقامی لوگوں سے بات کی گئی تو انہوں نے کہا کہ ہم لوگ تقریبا 150 برس سے اونٹوں کی قربانی کر رہے ہیں۔

انہوں نے کہا کہ یہاں پر اونٹ کی قربانی کا کوئی مسئلہ نہیں ہے اور اس کے لیے حکومت سے اجازت بھی نہیں لینی بڑتی۔

انہوں نے بتایا کہ علاقے کے لوگ چندہ کرکے مشترکہ طور پر اونٹ خریدتے ہیں اور قربانی کے بعد پورے علاقے میں گوشت تقسیم کیا جاتا ہے۔ یہ قربانی عید الاضحی کے دوسرے دن کی جاتی ہے۔