مئو میں تین سرکاری ہسپتال ہاٹ اسپاٹ میں تبدیل

مئو میں کورونا کیسز کی بڑھتی تعداد کے پیش نظر تین ہسپتال بھی ہاٹ اسپاٹ کی فہرست میں آگئے ہیں۔

اترپردیش کے ضلع مئو میں تین سرکاری ہسپتال ہاٹ اسپاٹ قرار دئے گئے ہیں۔ ان ہسپتالوں میں کورونا پازیٹیو معاملے سامنے آنے کے بعد انتظامیہ کافی محتاط ہو گیا ہے۔

ہاٹ اسپاٹ کی کارروائی کے بعد یہاں ہر روز سینیٹائزیشن کا عمل انجام دیا جا رہا ہے۔ بلدیہ کے اہلکار ہسپتالوں میں باقاعدگی سے اپنی ذمہ داری نبھا رہے ہیں۔

ہاٹ اسپاٹ قرار دئے جانے کے بعد بھی سرکاری ہسپتال کے خاتون وارڈ میں کچھ مریض موجود ہیں۔

ہسپتال کے ذمہ داروں کے مطابق مریضوں کی حالت ایسی نہیں ہے کہ انہیں دوسرے ہسپتال میں شفٹ کیا جا سکے۔

خاتون وارڈ میں خاص طور پر سنیٹائزیشن کیا جارہا ہے۔ ہاٹ اسپاٹ کئے گئے سرکاری ہسپتال کے اسٹاف کو کورنٹائن کر دیا گیا ہے۔

ہسپتال میں فی الحال ایمرجنسی وارڈ ہی کام کر رہے ہیں لیکن یہاں مریضوں کو دوا مہیا کرانے کا عمل بند ہے۔ مریضوں کو باہر سے دوائیں لینی پڑ رہی ہیں۔ بلدیہ ملازمین کے مطابق سینیٹائزیشن کا عمل 14 روز تک جاری رہے گا۔