یہ وقت راہل کے استعفیٰ کا نہیں: سنجے سنگھ

کانگریس کے سینیئر رہنما اور راجیہ سبھا کے رکن ڈاکٹر سنجے سنگھ نے کہا کہ 'آج کے حالات میں ملک کو راہل گاندھی جیسے ایماندار، نڈر اور بیباک لیڈر کی ضرورت ہے۔ یہ وقت ان کے استعفیٰ دینے کا نہیں بلکہ نئے عزم کے ساتھ کام کرنے کا ہے۔'

سنگھ نے اپنے بیان میں کہا کہ 'کانگریس کا سپاہی ہونے کی وجہ سے میں راہل گاندھی کی قیاد ت میں مکمل یقین و اعتماد ظاہر کرتےہوئے ان کے ساتھ کندھے سے کندھا ملا کر چلنے کو تیار ہوں۔ ملک کے مفاد میں راہل گاندھی سے درخواست کرتا ہوں کہ وہ اپنا استعفیٰ واپس لے کر پارٹی کی کمان کو اپنے ہاتھوں میں رکھتے ہوئے کانگریس کے تنظیمی ڈھانچے کو مضبوط کرنے کا کام کرتے رہیں۔'

انہوں نے کہا کہ 'آنے والے وقت میں کانگریس پارٹی مزید مضبوطی کے ساتھ سامنے آئے گی اور ملک کو ایک بہتر صاف و شفاف، ترقی پذیر حکومت ملے گی۔'

لوک سبھا انتخابات کے نتائج پارٹی کی توقعات کے برخلاف رہے ہیں۔ اس کی ذمہ داری لیتے ہوئے کانگریس صدر اہل گاندھی نے مجلس عاملہ کی میٹنگ میں صدر کے عہدے سے استعفیٰ دینے کی پیشکش کی ہے جسے مجلس عاملہ نے نامنظور کر دیا ہے۔

راہل گاندھی الیکشن کے موسم میں جس طرح سے کام کیا، وہ واقعی قابل تعریف ہے۔ اس دوران راہل نے بے حد نزدیکی اور باریکی سے کانگریس کی زمینی حقیقت کو دیکھا اور جانا ہے۔

سنگھ نے کہا کہ 'راہل گاندھی ایمانداری، سچائی اور بیباکی کے ساتھ اپنی بات کو ایوان اور میڈیا میں اٹھاتے رہے ہیں۔ جس کی جتنی تعریف کی جائے کم ہے۔ راہل کی کوششوں میں کوئی کمی نہیں رہی ہے۔ مجھے لگتا ہے کہ کانگریس پارٹی اپنی بات اپنی اسکیموں کو عوام تک نہیں پہنچا سکی جس کے نتائج میں پارٹی کو شکست سے دوچار ہونا پڑا۔'

لوک سبھا انتخابات کے نتائج کا ایمانداری کے ساتھ جائزہ لیا جانا چاہیے اور پورے ملک میں کانگریس کو مضبوط کرنے کے لیے ہر سطح پر ہر ممکن کوشش کی جانی چاہیے۔