ایس پی کے سابق رکن پارلیمان رام کِشون کا ویڈیو وائرل

ریاست اترپردیش کے ضلع چندولی کے مغل سرائے میں واقع سماج وادی پارٹی کے دفتر کا ایک ویڈیو سوشل میڈیا پر وائرل ہو رہا ہے۔ اس ویڈیو میں چندولی سے ایس پی کے سابق رکن پارلیمان رام کِشون پارٹی ضلع پنچایت اراکین کے پیروں پر گر کر مدد کی درخواست کرتے ہوئے نظر آرہے ہیں۔

جمعہ کی دیر رات کو سابق رکن پارلیمان رام کِشون ضلع پنچایت صدر کے عہدے کے لئے رائے دہندگی سے چند گھنٹے قبل ایس پی آفس میں ضلعی پنچایت اراکین کے پیروں پر گر کر پارٹی کے امیدوار کے لئے ووٹ مانگ رہے ہیں۔ اس دوران انھیں یہ کہتے ہوئے سنا جاسکتا ہے کہ میں پارٹی کا سپاہی ہوں، پارٹی کی کامیابی کے لئے کچھ بھی کروں گا۔

دراصل سماج وادی پارٹی نے سابق رکن پارلیمان رام کِشون یادو کے بھتیجے تیج نارائن یادو کو ضلع پنچایت صدر کے عہدے کا امیدوار بنایا ہے۔ ضلع پنچایت انتخابات میں ایس پی کے 14 امیدواروں نے کامیابی حاصل کی ہے جبکہ صدر کے عہدے کی کامیابی کے لئے 18 کے اعداد و شمار کی ضرورت ہے۔

ویڈیو وائرل ہونے کے بعد جب سابق رکن پارلیمان سے اس سلسلے میں پوچھا گیا تو انہوں نے واضح طور پر کچھ بھی کہنے سے انکار کردیا تاہم انہوں نے اتنا کہا کہ پارٹی کی عزت کے لئے وہ لوگوں کے پیروں پر گر سکتے ہیں۔ سماج وادی پارٹی کے اراکین رات کو دفتر پہنچے تھے، اطلاع ملنے کے بعد وہ بھی آفس پہنچ گئے۔

آپکو بتا دیں کہ چندولی میں ضلع پنچایت کی کل 35 سیٹیں ہیں، جس میں سماج وادی پارٹی کی 14، بھارتیہ جنتا پارٹی کی 8، بی ایس پی کی 5 اور 8 آزاد ممبر ہیں۔