لاوارثوں کے وارث تھے شاکر یار، ان کے انتقال سے غم کا ماحول

آج بریلی شہر کے کانکر ٹولہ قبرستان میں تمام شہریوں کے لبوں پر بارہا یہی کلمات موضوعِ بحث تھے۔ انداز اور الفاظ بے شک مختلف رہے ہوں گے، لیکن لب لباب یہی تھا کہ دنیائے فانی سے آج ایک ایسا شخص چلا گیا، جس کے جانے سے ایک خلاء پیدا ہو گیا ہے اور جس کا کوئی متبادل نہیں ہو سکتا۔ شاکر یار خاں نوری بریلی شہر کے لیے ایک ایسا نام تھا کہ جس کا ذکر آتے ہی لوگ صرف تعریف ہی کرتے تھے۔ شاکر یار خاں نوری نے آج دنیا کو الوداع کہہ دیا۔

دراصل لاوارثوں کا وارث، یتیموں کا سرپرست، ضرورت مندوں کی مشکلات کا حل، غریبوں اور بھوکوں کے لیے کھانے کا بندوبست کرنے والا، لاوارث لاشوں کی تدفین کرانے والے عظیم شخص کا نام شاکر یار خان نوری تھا۔ وہ ریلوے ٹریک، سڑک، جنگل، ہسپتال یا شہر کے مختلف علاقوں میں ملنے والی سینکڑوں لاوارث لاشوں کو اپنے ہاتھوں سے غسل دے کر اُن کے کفن اور دفن کا انتظام کرتے تھے اور تدفین کراتے تھے۔

لاک ڈاؤن میں اُنہوں نے تمام ضرورت مندوں کے گھروں کے دروازے پر خاموشی سے راشن کے پیکٹس رکھواکر انوکھی مثال قائم کی۔ کئی شہریوں کو یہ بھی نہیں معلوم ہو سکا کہ اُن کے دروازے پر کھانے یا راشن کے پیکٹ کون رکھ کر گیا ہے۔ وہ سرکاری ہسپتال میں مریضوں کا علاج کرانے آنے والے غریبوں کو باہر سے لکھی جانے والی مہنگی دوا خریدکر بھی لوگوں کو دیا کرتے تھے۔

غریب اور ضرورت مندوں کو ہسپتالوں میں لانے یا لے جانے کے لئے ایک ایمبولنس بھی چوبیس گھنٹے دستیاب رہتی تھی۔ اُنہوں نے ایسی لاوارث لاشوں کو غسل دیا ہے، جن کو ایک نظر بھوکے دیکھنا بھی کسی انسان کے لیے مشکل تھا۔

شاکر یار خاں نوری کا انتقال

شاکر یار خاں نوری ہر برس بارہ ربیع الاول کی بارہ تاریخ یعنی حضور سرورِ کائنات نبیٔ کریم محمد مصطفیٰ ﷺ کی یومِ پیدائش کے مبارک موقع پر 12 غریب اور ضرورت مند لڑکیوں کی شادیاں بھی کرواتے تھے۔

شاکر یار خاں نوری کا انتقال

خاص بات یہ ہے کہ وہ ہر لڑکی کو ایک لاکھ روپیہ قیمت کا گھر کی ضرورت کا سامان بطور جہیز بھی دیتے تھے۔ شہر کے مختلف علاقوں، سڑکوں، پوسٹ مارٹم ہاؤس، سرکاری ہسپتالوں میں بھی ”عوامی خدمات کمیٹی“ کے بورڈ لگے ہیں، جن پر لکھا ہے کہ ”لاوارث لاشوں کے لیے یہاں رابطہ قائم کریں یا ان نمبروں پر فون کریں، منجانب شاکر یار خاں نوری“۔

شاکر یار خاں نوری کا انتقال

اسی کا نتیجہ یہ ہے کہ اب تک سینکڑوں لاشوں کو غسل دینے والے شاکر یار خاں نوری سماجی خدمات کے تمام کام بڑے شوک اور جذبے کے ساتھ کرتے تھے۔ اُن کی ایک ٹیم بھی ہے، جو بازار سے تمام ضرورت کا سامان خریدکر جمع کرتی ہے۔

شاکر یار خاں نوری کا انتقال

شاکر یار خاں نوری کی خدمات کا سلسلہ یہیں نہیں تھمتا نظر آتا ہے۔ قدرت نے اُنہیں کوئی اولاد عطا نہیں کی۔ لیکن اللہ تعالیٰ نے اُن کے گھر میں تمام یتیم اور لاوارث بچوں کو بھیج دیا۔ آج یہ تمام بچے شاکر یار خاں نوری کی اولاد کے مانند ہیں۔ اُنہوں نے ان بچوں کو اپنی ولدیت میں شاکر یار خاں نوری لکھنے کی اجازت دی ہے۔ اُن کی رحلت کے بعد شہر میں تمام لوگوں نے رنج و غم کا اظہار کیا ہے۔

شاکر یار خاں نوری کا جانا اُس عظیم شخصیت کا جانا ہے کہ جس کے بعد پیدا ہوئے خلاء کو پُر کرنا مشکل ضرور ہے۔ شاکر یار خاں نوری دنیا سے کیا گئے، لاوارث بچوں کا وارث چلا گیا۔ لاوارث لاشوں کو غسل دیکر تدفین کرانے والا عظیم شخص دنیائے فانی سے چلا گیا۔ ہر سال 12 غریب لڑکیوں کی شادی کرانے والا دانشور چلا گیا۔ غریب مرد و خواتین کو دوا خریدنے کے لیے روپیہ عطیہ کرنے والا غنی چلا گیا۔ دوستوں کا دوست چلا گیا۔ اپنے حسن و اخلاق، سلام و دعا کے ذریعے شہریوں کے دلوں پر راج کرنے والا فقیروں کا بادشاہ چلا گیا۔

بچھڑا کچھ اس ادا سے کہ رت ہی بدل گئی

اک شخص سارے شہر کو ویران کر گیا۔