رامپور میں ایس آئی او کی عید ملن تقریب

ریاست اترپردیش کے شہر رامپور میں طلبہ تنظیم اسٹوڈنٹس اسلامک آرگنائزیشن آف انڈیا رامپور یونٹ کے کارکنان نے آج ایک اولڈ ایج ہوم جاکر بے سہارا بزرگوں و خواتین کے ساتھ عید کی خوشیاں باٹیں۔

اولڈ ایج ہوم ان بے گھر افراد کے لئے بیش قیمت نعمت سے کم نھیں، جو اپنے گھروں سے اپنے جگر کے ٹکڑوں کے ذریعہ بے گھر کئے گئے بزرگ و خواتین کو اپنی زندگی کی آخری سانسیں گننے کے لئے مجبور ہوکر جانا پڑتا ہے۔

عید الفطر کے موقع پر اپنے ساتھ دوسروں کو بھی عید کی خوشیوں میں شریک کرنے کے مقصد سے طلبہ تنظیم ایس آئی او کے کارکنان نے گزشتہ روزوردھا آشرم نامی ایک اولڈ ایج ہوم کادورہ کیا اور وہاں کے معزز ترین افراد سے ملاقات کی۔ ایس آئی او کے اس اقدام کو لوگوں نے سراہا۔

طلبہ کی تنظیم نے قرآن مجید کی روشنی میں والدین کی اہمیت اور ان کے ساتھ حسن اخلاق کے برتاؤ کو اجاگر کیا۔

پروگرام کا آغاز حافظ معین احمد کی تلاوت قرآن مجید سے ہوا جس کا ترجمہ پریم سنگھ نے پیش کیا۔

اس کے بعد اپنے کلیدی خطاب میں بصیر احمد نے عید کے پیغام کو واضح کیا۔ انہوں نے کہا کہ یہ عید ان لوگوں کے لئے نہایت ہی خوشی کا دن ہے جنہوں نے پورے خشوع و خضوع کے ساتھ رمضان کے روزوں کا اہتمام کیا۔

انہوں نے مزید کہا کہ اگر ہم ان کتابوں کو سمجھ کر پڑھیں تو ہمیں معلوم ہوگا کہ ایک انسان کی کیا اہمیت ہے۔ آپس میں ایک دوسرے کے ساتھ کیسا برتاؤ کرنا ہے۔

اس موقع پر بڑی تعداد میں ایس آئی او کارکنان کے علاوہ جماعت اسلامی سے وابستہ خواتین کارکنان بھی شریک تھے۔

پروگرام کی نظامت کا فریضہ ظفر احمد نے انجام دیا اور اخیر میں ایس آئی او کی جانب سے تمام حاضرین کا شکریہ اداکیا گیا۔