شیعہ پرسنل لاء بورڈ نے طالبان کی حمایت میں اٹھنے والی آواز کی مذمت کی

مولانا یعسوب عباس نے اپنے ویڈیو پیغام کے ذریعہ بھارت میں طالبان کی حمایت میں اٹھنے والی آواز کی سخت مذمت کی ہے۔

آل انڈیا شیعہ پرسنل لا بورڈ کے ترجمان مولانا یعسوب عباس نے اپنے ویڈیو پیغام کے ذریعہ بھارت میں طالبان کی حمایت میں اٹھنے والی آواز کی سخت مذمت کرتے ہوئے کہا کہ 'یہ بہت ہی افسوس ناک پہلو ہے کہ طالبان جیسے نظریات کی حمایت میں بھارت میں آواز بلند ہورہی ہے۔'

شیعہ پرسنل لا بورڈ اس کی سخت مذمت کرتا ہے اور ایسے لوگوں پر سخت کارروائی ہونی چاہیے انہوں نے کہا کہ 'یہ وہی طالبان ہیں جس نے بیان میں ہزارا کمیونٹی کو لوگوں کا استحصال اور ان پر تشدد کیا ہے۔ مذہب کے نام پر خونریزی و فساد مچانے والے طالبان کی آل انڈیا پرسنل لاء بورڈ سخت مخالفت کر رہا ہے۔'

انہوں نے کہا کہ 'افغانستان میں حضرت امام حسینؓ کے نام سے لگے جھنڈے کی بے حرمتی کی جارہی ہے طالبان نظریات کے یہاں بھی لوگ ہیں وہ حضرت امام حسینؓ سے منسوب مجلس علم کی توہین کرتے ہیں ہم اسے برداشت نہیں کرسکتے۔ شیعہ مکتب فکر کے لوگوں کی جانب سے ہم اس کی شدید مذمت کررہے ہیں۔'

واضح رہے کہ افغانستان پر طالبان کے قبضے کے بعد سماج وادی پارٹی سے رکن پارلیمان شفیق الرحمٰن برق نے طالبان کی حمایت کی تھی جن پر ایف آئی آر درج ہوئی ہے۔ مسلم پرسنل لاء بورڈ کے ترجمان سجاد نعمانی نے بھی حمایت کا اعلان کیا ہے اس کے علاوہ متعدد افراد ہیں جو حمایت کا اظہار کررہے ہیں۔'