پرتاپ گڑھ: سات پولیس اہلکار لائن حاضر

اترپردیش کے ضلع پرتاپ گڑھ میں پولیس کی چھاپہ ماری کے دوران ضعیف مقبول (68) کی مشتبہ حالات میں موت ہوگئی جس کے سبب مشتعل لوگ پولیس کے خلاف کیس درج کرنے پر بضد ہیں۔ وہیں اس معاملے میں سات پولیس اہلکاروں کو لائن حاضر کر دیا گیا ہے۔

ریاست اترپردیش کے ضلع پرتاپ گڑھ میں سپرنٹنڈنٹ انوراگ آریہ نے ضلع کے تھانہ سانگی پور پولیس کے ذریعہ گذشتہ ہفتہ کی شب تھانہ لال گنج کوتوالی علاقے کے بابو تارہ گاؤں میں چھاپہ مار کارروائی کے دوران ہوئی ضعیف کی موت کے معاملے میں سانگی پور ایس ایچ او سمیت سات پولیس اہلکاروں کو لائن حاضر کرکے تحقیقات کا حکم دیا ہے۔

ایڈیشنل پولیس سپرنٹنڈنٹ دنیش دیویدی نے بتایا کہ سانگی پور پولیس ملزم کی تلاش میں تھانہ لال گنج کوتوالی علاقے کے بابو تارہ گاؤں میں گذشتہ شب چھاپہ مارنے گئی تھی، جہاں چھاپہ ماری کے دوران ضعیف مقبول (68)کی مشتبہ حالات میں موت ہوگئی جس کے سبب مشتعل لوگ پولیس کے خلاف کیس درج کرنے پر بضد ہیں۔

پولیس سپرنٹنڈنٹ نے معاملے کو سنجیدگی سے لیتے ہوئے تھانہ سانگی پور ایس ایچ پرمود کمار سمیت سات پولیس اہلکاروں کو لائن حاضر کرکے تحقیقات کا حکم دیا ہے۔

تحقیقات کے بعد مزید قانونی کارروائی کی جائے گی، جبکہ سمجھانے بجھانے پر اہل خانہ لاش کو دفن کرنے کے لیے تیار ہوگئے ہیں۔

دوسری جانب اہل خانہ کا الزام ہے کہ مقبول کی موت پولیس کی پٹائی سے ہوئی ہے جس کے پیش نظر مشتعل لوگوں نے وزیر اعلی کو میمورنڈم دے کر وقوعہ کی مجسٹریٹ تحقیقات کرانے، خاطی پولیس اہلکاروں کے خلاف کیس درج کرنے، معاوضہ، ملازمت و اسلحہ لائسنس کا مطالبہ کیا ہے۔