یوگی حکومت پر پرینکا گاندھی کی سخت تنقید

کانگریس کی اتر پردیش کی جنرل سکریٹری پرینکا گاندھی نے پانچ سالہ معاہدے پر کام کرنے کے بعد مستقل ملازمت دینے کے ریاستی حکومت کے منصوبے کی سخت نکتہ چینی کرتے ہوئے کہا کہ یہ نوجوانوں کی توہین ہے۔

نئی دہلی:کانگریس کی اتر پردیش انچارج اور جنرل سکریٹری پرینکا گاندھی نے پانچ سالہ معاہدے پر کام کرنے کے بعد مستقل ملازمت دینے کے ریاستی حکومت کے منصوبے کی سخت نکتہ چینی کرتے ہوئے کہا ہے کہ ”یہ نوجوانوں کی توہین ہے اور ان کے زخموں پر نمک چھڑکنے کے مترادف ہے۔

پرینکا گاندھی نے کہا کہ "معاہدہ کی ملازمتوں سے احترام غائب ہے، پانچ سالہ معاہدہ نوجوانوں کی توہین کا قانون ہے، سپریم کورٹ نے بھی ماضی میں اس طرح کے قانون پر سخت تبصرہ کیا ہے۔ اس نظام کو لانے کا مقصد کیا ہے؟ حکومت نوجوانوں کے درد پر مرہم لگا نے کے بجائے ان کا درد بڑھانے کا منصوبہ بنا رہی ہے۔ ہمیں نہيں چاہئے ٹھیکہ"۔
پارٹی میڈیا سیل کے انچارج رندیپ سنگھ سورجے والا نے بھی سرکاری ملازمت کے معاملے میں بھارتیہ جنتا پارٹی (بی جے پی) کی حکومت پر حملہ کرتے ہوئے کہا کہ "12 کروڑ نوکریاں پہلے ہی جاچکی ہیں۔ ایک کروڑ 75 لاکھ چھوٹے کاروبار بند ہونے کے دہانے پر ہیں۔ اگر ان میں سے آدھے بھی بند ہوجائيں تو 20 کروڑ سے زیادہ لوگوں کی روزی روٹی ختم ہوجائے گی۔ مودی جی خاموش کیوں ہیں؟ "۔

ایک رپورٹ کے مطابق اترپردیش میں یوگی آدتیہ ناتھ کی حکومت سرکاری ملازمتوں کی بھرتی میں ایک بڑی تبدیلی کی تیاری کر رہی ہے اور اس کے تحت وہ گروپ 'بی' اور 'سی' کے تحت ملازمتوں کی بھرتی میں کامیاب امیدواروں کو پانچ سال کے لئے معاہدے پر رکھے گی، جس کے بعد مکمل محاسبے کی بنیاد پر ملازمت مستقل کی جائے گی۔