'قبرستان میں مُردوں کو بجلی کی کیا ضرورت؟'

ریاست اترپردیش کے ضلع غازی آباد کے ایک قبرستان کی بجلی سپلائی کو محکمۂ بجلی نے منقطع کردیا ہے۔

غازی آباد کے پرتاپ وہار علاقے میں واقع قبرستان میں گزشتہ 10 دنوں سے بجلی نہیں ہے، جس کے سبب رات میں میت لانے والوں کو کافی پریشانیوں کا سامنا کرنا پڑرہا ہے۔

قبرستان کے ذمہ داران نے جب محکمۂ بجلی کے افسران سے اس بات کی شکایت کی تب، افسران نے انھیں یہ جواب دیا کہ' قبرستان میں مُردوں کو بجلی کی کیا ضرورت ہے، وہ تو رات میں بھی اندھیرے میں سوتے ہیں'۔

مقامی لوگوں کا کہنا ہے کہ' رات میں جب قبرستان میں میت لائی جاتی ہے تب اندھیرا ہونے کے سبب لوگوں کو کافی دشواری ہوتی ہے۔

حالانکہ محکمۂ بجلی کے افسران نے اس طرح کی کوئی بات کہے جانے سے انکار کردیا۔

افسران کا کہنا ہے کہ' قبرستان میں نصب بجلی ٹرانسفارمر سے آس پاس رہنے والے لوگ بجلی چوری کررہے تھے، اسی وجہ سے بجلی سپلائی منقطع کی گئی ہے'۔