سہارنپور: 25 ہزار کا انعامی بدمعاش گرفتار

سہارنپور علاقہ کے تھانہ صدر بازار پولیس اور سرویلانس ٹیم نے 25ہزار کے انعامی بدمعاش کو گرفتار کرنے میں کامیابی حاصل کی۔ بدمعاش کے پاس سے غیرقانونی اسلحہ، زندہ کارتوس بھی برآمد ہوئے ہیں۔

بدمعاش گزشتہ 4 سال سے فرار چل رہا تھا۔ موصولہ اطلاع کے مطابق ایس ایس پی سہارنپور ڈاکٹر ایس چننپا کی ہدایات پر سہارنپور پولیس جرائم پیشہ افراد کے خلاف مہم چلا رہی ہے۔

اسی مہم کے تحت سہارنپور کے تھانہ صدر بازار علاقہ کی پولیس کی قیادت میں سرویلانس ٹیم کے ذریعہ 4 سال سے فرار چل رہے ملزم دانش ولد فاروق تھانہ کوتوالی دیہات سہارنپور کو مخبر کی اطلاع پر روڈ ویز بس اسٹینڈ سے گرفتار کیا گیا ہے۔

واضح ہو کہ ملزم 2016 میں عدالت میں سماعت کے دوران پولیس کسٹڈی سے فرار ہوگیا تھا، جس کے اوپر مختلف تھانوں میں مقدمات درج ہیں۔ گرفتار کیا گیا بدمعاش شاطر قسم کا ملزم ہے، جس کے خلاف قتل، غیرقانونی ہتھیار رکھنے، قتل کی کوشش کرنے سمیت مختلف تھانوں میں مقدمات درج ہیں۔

ساتھ ہی ایس ایس پی کی جانب سے گرفتار کیے گیے بدمعاش کے اوپر 25 ہزار روپے کے انعام کا بھی اعلان کیا تھا۔