ریاست اترپردیش حکومت کا اہمیت کا حامل پروگرام قومی ماہ تغذیہ کا بلاک دادری کے گاؤں چھیتھرا میں ضلع مجسٹریٹ سوہاس ایل وائی نے افتتاح کیا۔ انہوں نے اس موقع پر بچوں کی پرورش پر خصوصی توجہ دینے کی تلقین کی۔
اس موقع پر چیف ڈیولپمنٹ افسر انیل کمار سنگھ، ضلع بیسک ایجوکیشن افسر، ضلع پنچایت افسر موجود تھے۔ اس پروگرام کے تحت اسکولوں میں نیوٹریشن گارڈن تیار کیے جائیں گے۔
ضلع افسر کے ذریعہ پرائمری اسکول کے کیمپس میں قائم نیوٹریشن گارڈن میں پلانٹ بھی لگایا گیا۔ ضلع مجسٹریٹ نے آنگن واڑی کارکنان کے کام کی ذمہ داریوں سے متعلق ایک مختصر ویڈیو فلم بھی لانچ کی۔ جسے آنگن واڑی کارکنان کا جوش و جذبہ بڑھانے اور عوام میں آنگن واڑی کی خدمات کے بارے میں معلومات میں اضافہ کرنے کے لیے سوشل میڈیا پر تشہیر کی جائے گی۔
تقریب میں موجود ادارے کے نمائندوں کے ذریعہ حاملہ اور دودھ پلانے والی خواتین کو 3000 ماسک بھی دستیاب کرائے گئے۔ اس کام کے لیے ضلع مجسٹریٹ نے متعلقہ ادارے کی کاوش کو سراہا ہے اور کہا ہے کہ کورونا کو مدنظر رکھتے ہوئے دیگر ادارے بھی آگے آسکتے ہیں اور اس سمت میں کام کرسکتے ہیں۔