مرادآباد: سڑک کی خستہ حالی سے عوام پریشان

مرادآباد سے اتراکھنڈ کی جانب جانے والی سڑک کی خستہ حالی سے لوگوں کو کافی مشکلات کا سامنا کرنا پڑرہا ہے۔ اس ضمن میں مقامی لوگوں کا کہنا ہے کہ سڑک میں گڑھے ہونے سے حادثہ لاحق رہتا ہے۔

مرکزی حکومت اور صوبائی حکومت سڑکوں کو درست رکھنے کے لئے کئی منصوبے چلارہی ہے وہیں وزیر اعلیٰ یوگی آدتیہ ناتھ نے بھی ایک جلسۂ عام کو خطاب کرتے ہوئے کہا تھا کہ اترپردیش کی سبھی سڑکوں کو گڑھا مکت کیا جائے گا اور اعلیٰ افسران کو احکامات بھی جاری کیے گئے۔ اس سلسلے میں جب ہمارے نمائندہ نے مرادآباد سے اتراکھنڈ کی طرف جانے والی سڑک کا معائنہ کیا تو سڑک میں گہرے گہرے گڑھوں میں بسیں، کاریں اور دیگر گاڑیاں ڈگمگاتی دکھائی دی۔

مقامی اور راہ چلتے لوگوں نے ای ٹی وی بھارت اردو سے بات چیت کرتے ہوئے کہا کہ سڑک میں گڑھوں کی وجہ سے کئی حادثات پیش آئے اور ان حادثوں میں کئی لوگوں کی جان بھی جاچکی ہے۔

راہ چلتے لوگوں نے کہا کہ سڑک میں گڑھے نہیں ہیں بلکہ گڑھوں میں سڑک بنی ہوئی ہے مرادآباد سے اتراکھنڈ کی جانب جانے والی یہ سڑک جم کاربیٹ نیشنل پارک اور نینی تال کی طرف جاتی ہے اور اسی سڑک سے سیاح بھی گزرتے ہیں۔

مقامی لوگوں کا کہنا ہے کہ سڑک کی خستہ حالی سے حادثہ پیش آنے کا خدشہ رہتا ہے۔ اس لیے ہم حکومت سے مطالبہ کرتے ہیں کہ سڑک کی جلد از جلد مرمت کی جائے۔