میرٹھ: اسکرب ٹائفس بخار کے مریض ملنے پر محکمہ صحت الرٹ

ریاست اترپردیش میں ان دِنوں ڈینگو کے علاوہ اسکرب ٹائفس نام کے بخار کا خطرہ بھی بڑھ گیا ہے۔ اترپردیش کے مختلف اضلاع سے بخار کے معاملات سامنے آرہے ہیں، میرٹھ میں آج ایک سائفس بخار کے مریض ملنے سے محکمہ صحت میں ہنگامہ مچ گیا۔ خطرے کو دیکھتے ہوئے محکمہ صحت و انتظامیہ نے سخت اقدامات اٹھانے شروع کردیے ہیں۔

اتر پردیش کے فیروز آباد، آگرہ اور کانپور سمیت متعدد شہروں سے اب تک اسکرب ٹائفس بخار کے درجنوں معاملے سامنے آ چکے ہیں جن میں معتدد مریض اپنی زندگی سے ہاتھ دو بیٹھے ہیں۔

میرٹھ میں اسکرب ٹائفس کا پہلا مریض ملنے سے محکمہ صحت میں افراتفری پھیل گئی ہے۔ میرٹھ کے کھرکھودا تھانہ علاقے کے کیلی گاؤں کے ایک شخص میں اسکرب ٹائفس بخار کے اثرات ملنے سے ضلع انتظامیہ اور محکمہ صحت نے خطرے کو دیکھتے ہوئے اور اس کی روک تھام سے متعلق احتیاطی اقدامات اٹھارہے ہیں۔

واضح رہے کہ یوپی میں کورونا کے بعد ڈینگو بخار کے مریضوں کے ملنے کا سلسلہ جاری ہے۔ ایسے میں اب میرٹھ میں اسکرب ٹائفس کا پہلا مریض ملنے کے بعد محکمہ صحت اور ضلع انتظامیہ کی جانب سے عوام میں صاف صفائی کے لیے بیداری مہم چلائی جا رہی ہے تاکہ اس کے خطرے سے بچا جا سکے۔