بنارس: استاد بسم اللہ خان کے نام سے منسوب سڑک خستہ حال

شہنائی کے معروف فنکار استاد بسم اللہ خان نے اپنے فن کی بدولت پوری دنیا میں منفرد مقام حاصل کیا اور بھارت کے سب سے اعلیٰ اعزاز بھارت رتن سے بھی نوازے جاچکے ہیں۔ استاد بسم اللہ خان کے گھر کو جانے والی سڑک شیور لائن کے گندہ پانی میں ڈوب چکی ہے، جس کی وجہ سے لوگوں کو شدید مشکلات کا سامنا ہے۔ یہ حالات قریب دو ہفتے سے ہیں، جس پر نہ ہی میونسپل کارپوریشن کے افسران توجہ دے رہے ہیں اور نہ ہی ضلع انتظامیہ اس جانب کوئی اقدامات کر رہی ہے۔

سب سے شرمناک بات یہ ہے کہ بھارت رتن استاد بسم اللہ خان کے نام سے لگے ہوئے پتھر بھی گندے پانی میں ڈوبے ہوئے ہیں۔ اس کے باوجود اس جانب کسی افسر کی توجہ نہیں ہے۔

آپ کو بتا دیں کہ بھارت رتن استاد بسم اللہ خان کے اعزاز میں کئی برس پہلے بنارس میونسپل کارپوریشن کی جانب سے ان کے گھر کی طرف جانے والی سڑک کو استاد بسم اللہ خان کے نام سے موسوم کیا گیا تھا اور ان کے نام سے پتھر بھی نصب کئے گئے تھے، لیکن موجودہ وقت میں اس سڑک کی حالت انتہائی خستہ ہے۔ پوری سڑک ٹوٹی پھوٹی ہے سیور لائن کا پانی سڑکوں پر بہہ رہا ہے۔

استاد بسم اللہ خان کے نام سے منسوب سڑک خستہ حال

استاد بسم اللہ خان کے نام سے لگے ہوئے پتھر بھی گندے پانی میں ڈوبے ہوئے ہیں۔ میونسپل کارپوریشن کی عدم توجہی نہ صرف علاقائی لوگوں کے لئے پریشانی کا باعث ہے بلکہ بھارت رتن استاد بسم اللہ خان کی توہین کے طور پر دیکھا جا رہا ہے۔

علاقائی لوگوں کی مانیں تو یہ صرف استاد بسم اللہ خان والی سڑک کا حال نہیں ہے بلکہ پورے علاقے میں اسی طرح سے گندا پانی بہتا رہتا ہے۔ شکوہ وشکایت کے باوجود بھی افسران کوئی توجہ نہیں دے رہے ہیں۔