انسانوں کی سیوا اور قرآن مجید کتاب کا اجراء

شعبہ علم امراض نفسیات اے ایم یو کے سابق صدر اور معروف سماجی کارکن پروفیسر سہیل احمد اعظمی نے شعبہ اسلامک اسٹڈیز کے ریٹائرڈ پروفیسر ظفر الاسلام اصلاحی کی کتاب "انسانوں کی سیوا اور قرآن مجید" کا اجراء اپنی رہائش گاہ پر کیا۔

علی گڑھ مسلم یونیورسٹی کے شعبہ اسلامک اسٹڈیز کے ریٹائرڈ پروفیسر ظفر الاسلام اصلاحی کی کتاب "انسانوں کی سیوا اور قرآن مجید" کا رسم اجرا عمل میں آیا۔ اس کتاب کا اجرا شعبہ علم امراض نفسیات اے ایم یو کے سابق صدر پروفیسر سہیل احمد اعظمی کی رہائش گاہ پر ان کے ہاتھوں عمل میں آیا۔

رسم اجرا کے اس موقع پر کتاب کے مصنف کے علاوہ شعبہ دینیات کے ایسوسی ایٹ پروفیسر ڈاکٹر محمد راشد اصلاحی بھی موجود تھے۔ مدھر سندیش سنگم، نئی دہلی سے شائع شدہ اس کتاب میں یہ واضح کیا گیا ہے کہ قرآن کریم میں اللہ رب العزت کی عبادت و بندگی بجالانے کے ساتھ اس کے بندوں کی خدمت اور بھلائی کا کام انجام دینے پر خاص زور دیا گیا ہے۔

اس موقع پر مصنف نے کتاب کی اہمیت پر روشنی ڈالتے ہوئے کہا کہ قرآن میں اہل ایمان کی یہ خصوصیات بیان کی گئی ہے کہ وہ لوگوں کی نفع پہنچاتے رہتے ہیں۔ قرآن کی بہت سی آیات سے یہ معلوم ہوتا ہے کہ اللہ تعالی محسنین یعنی لوگوں کے ساتھ بھلائی کرنے والوں کو پسند فرماتا ہے اور انہیں بہترین اجر عطا فرمائے گا۔

پروفیسر اصلاحی کی اس کتاب میں اس نکتہ کو خاص طور سے نمایاں کیا گیا ہے کہ قرآن مجید بلا کسی تفریق سب کے ساتھ اچھا برتاؤ، انصاف اور بھلائی کا معاملہ کرنے کی تاکید کرتا ہے۔ رسم اجرا اس موقع پر شرکاء نے اس کتاب کو وقت کی ضرورت قرار دیا۔