کانپور: والدین کے ساتھ بدسلوکی کرنے پر بیٹا گرفتار

کانپور میں ایک شخص نے اپنے بزرگ والدین کو رات دو بجے گھر سے نکال دیا۔ والدین کی مدد کرتے ہوئے پولیس نے انہیں گھر واپس لایا اور بزرگ والدین کی شکایت پر بیٹے کو گرفتار کر کے جیل بھیج دیا گیا۔

کانپور کے کرنل تھانہ علاقے کے عیدگاہ کے پاس 75 سالہ ماتا پرشاد اور ان کی اہلیہ وملا دیوی اپنے بیٹے پنکج کے ساتھ رہتے تھے، بیٹا اکثر اپنے والدین کو مارا پیٹا کرتا تھا۔ گذشتہ روز والدین کو مارنے پیٹنے کے بعد رات دو بجے پنکج نے انہیں زبردستی گھر سے نکال دیا۔

بے سہارا بزرگ والدین روتے بلکتے لوگوں سے فریاد کر رہے تھے، تبھی مقامی لوگوں نے اے سی پی ترپراری پانڈے کو اس کی اطلاع دی جس کے بعد انہوں نے بزرگ والدین کو اپنی گاڑی میں بٹھا کر ان کے گھر لے گئے اور پھر وہاں والدین کے ساتھ زیادتی کرنے والے پنکج کو حراست میں لے لیا اور والدین کی تحریری شکایت کے بعد کارروائی کرتے ہوئے پنکج کو جیل بھیج دیا۔ ساتھ ہی علاقے کے لوگوں کو یہ ہدایت دی گئی کہ اگر کسی نے بھی ان بزرگوں کو پریشان کیا یا ان کے ساتھ مارپیٹ کی گئی تو ان کے خلاف سخت کارروائی کی جائے گی۔

اس واقعے کے بعد کمشنر کانپور نے پورے شہر کے سبھی تھانہ داروں کو بھی ہدایت دی کہ وہ اپنے حلقوں میں اس بات کا اعلان کر دیں کہ اگر کسی شخص نے بھی پانے والدین کے ساتھ مار پیٹ کی یا انہیں گھر سے نکالنے کی کوشش کی تو ان کے خلاف سخت سے سخت قانونی کارروائی کی جائے گی اور انہیں جیل بھیجا جائے گا۔