کانپور: تین اے ٹی ایم ہیکرز گرفتار

اترپردیش کی کانپور پولیس نے تین شاطر اے ٹی ایم ہیکرز کو گرفتار کیا ہے جو جدید ٹیکنالوجی کی مدد سے اے ٹی ایم سے پیسے تو نکال لیتے تھے لیکن اکاؤنٹ سے پیسہ نہیں کٹتا تھا۔

پولیس نے ان ہیکرز کے پاس سے تقریباً ڈھائی سو سے زیادہ اے ٹی ایم کارڈز برآمد کیے ہیں اور پانچ لاکھ روپیے سے زیادہ رقم ضبط کی۔ پولیس کمشنر کانپور کی گائڈ لائن پر کرائم برانچ کانپور نے نوبستہ پولیس کے ساتھ مل کر تین انٹر اسٹیٹ اے ٹی ایم مشین ہیکرز کو گرفتار کیا ہے، پکڑے گئے شاطر اے ٹی ایم ہیکر پرمود کمار، روی کمار اور نند کشور کچھ وقت سے کانپور کے کئی بینکوں کے اے ٹی ایم سے پیسے کی چوری کررہے تھے۔

پولیس نے جب ان کو گرفتار کیا تو ان کے پاس سے ریاست کے کئی شہروں کے مختلف بینکوں کے تقریباً دو سو پچاس سے زائد اے ٹی ایم کارڈس برآمد ہوئے ہیں۔ ان لوگوں نے کانپور میں گزشتہ دنوں 6 لاکھ روپیے سے زیادہ اے ٹی ایم مشین کو ہیک کرکے نکالے تھے۔

کرائم برانچ کی ٹیم ان ہیکرز کے پیچھے کئی دنوں سے لگی ہوئی تھی، ان کے موبائل لوکیشن حاصل کرنے کے بعد ٹیم نے انہیں رنگے ہاتھوں گرفتار کرلیا ہے۔ پولیس نے ان کے قبضے سے جن اے ٹی ایم کارڈز کو برآمد کیا ہے۔ پولیس افسر نے بتایا کہ ہیکرز اکاونٹ ہولڈرز کو رقم دے کر اے ٹی ایم کارڈ حاصل کرتے تھے پھر اس میں رقم جمع کرتے تھے۔

اس اکاؤنٹس سے پیسے کو جب یہ اے ٹی ایم سے نکالتے ہیں تو جس وقت پیسے کے نکالے جانے کا عمل ہورہا ہوتا ہے اسی وقت یہ اپنی جدید ٹیکنالوجی سے اے ٹی ایم مشینوں میں چھیڑ چھاڑ کرتے ہیں جس سے یہ پیسہ تو نکال لیتے ہیں لیکن لکھ کر آتا ہے کہ ٹرانزیکشن فیل ہے، یہ لوگ پھر بینک میں جاکر اس کی شکایت کرکے اپنے اکاؤنٹ میں پیسہ واپس کرالیتے ہیں۔ اس طرح سے یہ ہیرا پھیری کرکے پیسہ بھی نکال لیتے ہیں اور ان کے اکاؤنٹ سے پیسہ بھی نہیں کٹتا ہے۔