کانپور:اے ایس پی اپرنا گپتا معطل

22 جون 2020 کو برّا پانچ باشندہ چمن لال کے اکلوتے بیٹے سنجیت یادو کو اغوا کر لیا گیا تھا جس کے ایک مہینے بعد پولیس نے ان کے قتل کی تصدیق کر دی ہے۔

اترپردیش کے ضلع کانپور کے برّا علاقے میں پیتھالوجی ٹیکنیشین کے اغوا کے بعد قتل کے معاملے کا سخت نوٹس لیتے ہوئے وزیر اعلی یوگی آدتیہ ناتھ نے ایڈیشنل سپرنٹنڈنٹ آف پولیس اپرنا گپتا کو معطل کرنے کا حکم دیا ہے۔

سرکاری ترجمان نے جمعہ کو بتایا کہ برّا علاقے میں ایک نوجوان کے اغوا کے معاملے میں ڈیوٹی میں لاپروائی برتنے کے الزام میں تھانہ انچارج رجنیت رائے اور چوکی انچارج راجیش کمار کو پہلے ہی معطل کیا جاچکا ہے۔ اسی ضمن میں سینئر سپرنٹنڈنٹ آف پولیس دنیش کمار پی نے ایڈیشنل سپرنٹنڈنٹ آف پولیس اپرنا گپتا اور سرکل افسر منوج گپتا کو معطل کردیا ہے۔

قابل ذکر ہے کہ گذشتہ 22 جون کو برّا پانچ باشندہ چمن لال کے اکلوتے بیٹے سنجیت یادو کا اغوا کر لیا گیا تھا۔ جس کے ایک مہینے بعد پولیس نے گذشتہ رات بتایا کہ سجیت کا قتل کردیا گیا ہے۔

پولیس نے اس سلسلے میں سجیت کے چار دوستوں کو گرفتار کیا ہے۔ اہل خانہ اس معاملے میں پہلے دن سے ہی پولیس پر لاپروائی برتنے کا الزام لگاتے رہے ہیں۔