مساجد ویران دیکھ کر دل روتا ہے: امام جامع مسجد رامپور

ریاست اترپردیش کے رامپور میں رمضان المبارک کے پہلے جمعہ کے موقع پر مسلمانوں نے گھروں پر نمازیں ادا کیں، وہیں جامع مسجد سمیت ضلع کی تمام مساجد میں صرف پانچ۔ پانچ نمازیوں نے نماز جمعہ ادا کی۔

کورونا وائرس کی روک تھام کے لئے ملک بھر میں لاک ڈاؤن جاری ہے۔ آج لاک ڈاؤن کے دوران رمضان المبارک کا پہلا جمعہ تھا۔ رامپور کی تمام مساجد سمیت جامع مسجد رامپور میں بھی صرف پانچ نمازیوں نے ہی نماز جمعہ ادا کی۔

یہ وہی تاریخی جامع مسجد ہے، جہاں دیگر جمعوں میں تو نمازی بڑی تعداد میں نماز ادا کرتے ہی ہیں وہیں رمضان المبارک میں پانچ ہزار مسلین والی جامع مسجد نمازیوں سے پوری طرح بھر ہی نہیں جاتی تھی بلکہ مسجد کے باہر دور تک نمازیوں کی صفیں بن جاتی تھیں۔

لیکن کورونا وائرس جیسی وبا سے نمٹنے کے لئے یہ مسجد بھی اپنے نمازیوں سے محروم ہو گئی ہے۔

رمضان المبارک کا پہلا جمعہ

آج نائب امام جامع مسجد مولانا حثیب احمد کی امامت میں نماز جمعہ ہوئی اور صرف پانچ نمازیوں نے ہی نماز جمعہ ادا کی۔

اس موقع پر نائب امام نے اپنے جذبات کا اظہار کرتے ہوئے کہا کہ رمضان المبارک میں بھی جامع مسجد کو ویران دیکھ کر دل روتا ہے، لیکن کورونا جیسی وبا سے لڑنے کے لئے یہ ضروری بھی تھا۔