آئی ٹی آئی امتحانات میں نقل کرانے کا الزام

ریاست اترپردیش کے شہر بارہ بنکی کے پائنیر ڈگری کالج پر آئی ٹی آئی امتحانات کے دوران سرکاری کالجز میں پڑھنے والے طلبا کو نقل کرانے کا الزام عائد کیا گیا ہے۔

امتحانات میں شامل ہونے والے نجی کالجز کے طلبا کا کہنا ہے کہ 'کالج انتظامیہ نے سرکاری کالجز کے طلبا کو ایک گھنٹے بعد امتحان کا پرچہ دیا گیا اور اس کے بعد نجی طلبا سے وقت سے پہلے کاپی لے لی گئی نیز سرکاری آئی ٹی آئی کے طلبا کو زبانی طور پر جواب لکھائے گئے'۔

انہوں نے کہا کہ 'مخالفت کرنے پر انہیں دھمکی دی گئی اور کالج سے باہر نکال دیا گیا۔'

طلبا کا الزام ہے کہ 'کالج انتظامیہ نے کمروں میں سی سی ٹی وی کیمرے بند کرا دیے اور کالج کے اساتذہ نے طلبا کے ساتھ بدسلوکی بھی کی'۔

اس کے بعد طلبا ڈسٹرکٹ مجسٹریٹ سے شکائیت کرنے کے لیے کلکٹریٹ دفتر پہنچے لیکن ڈی ایم وہاں موجود نہیں تھے۔

نجی کالجز کے طلبا نے ایس ڈی ایم کے پاس تحریری طور پر شکایت درج کرائی اور امتحانی مرکز تبدیل کرانے کا مطالبہ کیا۔