ریاست اترپردیش کے ضلع بارہ بنکی میں مہاتما گاندھی اسپورٹس کلب کے قیام کا مقصد کھیلوں کو فروغ دینے کے ساتھ ساتھ مہاتما گاندھی کے نظریہ اور فلسفے کو آنے والی نسلوں میں مستحکم کرنا ہے۔
بارہ بنکی شہر کے گاندھی بھون میں ہوئے اس پروگرام میں مختلف کھیلوں کے مشہور کھلاڑی موجود رہے۔ ان میں سے 20 کھلاڑیوں کو سند اور یادگاری نشان دے کر اعزاز سے نوازا گیا۔
گاندھی جینتی سماروہ ٹرسٹ کے بانی پنڈت راج ناتھ شرما نے بتایا کہ مہاتما گاندھی کی 150 ویں جینتی پر گذشتہ ایک برس سے مختلف پروگرام ہو رہے تھے۔ کھیل کے حلقے میں کوئی پروگرام نہ ہونے کی شکایت تھی۔ اس لیے یہ پروگرام کیا گیا۔
انہوں نے کہا کہ مہاتما گاندھی اسپورٹس کلب قائم کرنے کا مقصد آنے والی نسلوں میں گاندھی جی کے نظریے کو زندہ رکھنا ہے۔
انہوں نے بتایا کہ یہ کلب کھلاڑیوں کی ہر قسم سے مدد کرے گا اور ان کی کوشش ہے کہ آئندہ دو برس میں 20 کھلاڑیوں کے لیے اسپورٹس ہاسٹل کی تعمیر کرا سکیں۔
