انڈین میڈیکل ایسوسی ایشن کی ہڑتال کا اثر، او پی ڈی بند

آیورویدک ڈاکٹروں کو مریضوں کی سرجری یعنی آپریشن کرنے کی اجازت دینے کے خلاف نوئیڈا اور گریٹر نوئیڈا میں انڈین میڈیکل ایسوسی ایشن (آئی ایم اے) کی ہڑتال کا اثر دیکھنے کو ملا۔ اس دوران ایمرجنسی اور کووڈ 19 کو چھوڑ کر او پی ڈی خدمات متاثر رہیں۔

ریاست اترپردیش کے شہر نوئیڈا کے ڈاکٹروں نے اپنے نجی ہسپتالوں، نرسنگ ہومز، کلینک کی او پی ڈی اور پیتھالوجی لیب بند کرکے اپنا احتجاج درج کرایا۔

ڈاکٹروں کا کہنا ہے کہ مریضوں کے مفاد میں حکومت فوری طور پر اس فیصلے کو واپس لے۔ آئی ایم اے کے گریٹر نوئیڈا کے صدر ڈاکٹر پردیپ سنگھ نے بتایا کہ آئی ایم اے کے اعلان کے بعد گوتم بدھ نگر ضلع کے تمام نجی ہسپتال، کلینک اور نرسنگ ہوم کی او پی ڈی کو 12 گھنٹے بند رکھنے کا فیصلہ کیا گیا ہے۔

انہوں نے بتایا کہ ضلع میں رجسٹرڈ 470 نجی کلینک اور نرسنگ ہوم میں او پی ڈی بند ہیں، لیکن ہنگامی خدمات جاری ہیں۔

انہوں نے کہا کہ حکومت کے اس فیصلے سے مریضوں کا مفاد متاثر ہوگا اور کئی برسوں تک تعلیم حاصل کرنے والے ایم بی بی ایس، ایم ایس سرجن کے حوصلے پست ہوجائیں گے۔