رامپور: 16 کروڑ 75 لاکھ کا کاروبار کرنے کے بعد ہنر ہاٹ کا اختتام

اقلیتی امور کی مرکزی وزارت کی جانب سے اترپردیش کے شہر رامپور میں منعقدہ ہنر ہاٹ 16 کروڑ 75 لاکھ کا کاروبار کرنے کے بعد اختتام پزیر ہو گیا۔ ہنرمندوں کی صنعتوں کو فروغ دینے کے مقصد سے لگائے گئے اس ہنر ہاٹ میں شائیقین ہزاروں کی تعداد میں پہنچے۔

اقلیتی بہبود کی وزارت کی جانب سے رامپور کے نمائش گراونڈ میں قومی سطح کے 10 روزہ ہنر ہاٹ کا اہتمام کیا گیا۔ لوکل فار ووکل تھیم کے تحت منعقدہ اس ہنر ہاٹ کا مقصد ملک کی چھوٹی صنعتوں سے جڑے ہنر مندوں کے ہنر کو فروغ دینا تھا۔

یہی وجہ ہے کہ ملک کے 27 صوبوں سے آئے دو سو ہنر مندوں کے اسٹالز لگائے گئے۔ جن پر تقریباً 16 کروڑ 75 لاکھ روپئے کا کاروبار ہوا۔ اس دوران ہر روز ہزاروں شائیقین کی بھیڑ رہی۔

سب سے زیادہ بھیڑ کھانے پینے کے ذائقوں کے اسٹالوں پر دیکھنے میں آئی۔ جہاں لوگوں نے الگ الگ ریاستوں کے کھانوں کا ذائقہ لیا۔

اس دوران ثقافتی پروگراموں کا بھی اہتمام کیا گیا جہاں ہر روز مختلف فنکاروں نے اپنے فن کے جوہر دکھا کر لوگوں کو اپنی جانب راغب کیا۔

لوکل فار ووکل تھیم کے تحت رامپور میں منعقدہ اس ہنر ہاٹ میں کوی سمیلن اور کل ہند مشاعرہ کا بھی اہتمام کیا گیا لیکن رامپور کی ادبی خدمات کو فراموش کرتے ہوئے رامپور کے کسی بھی شاعر اور ادیب کو مدعو نہیں کیا گیا۔ جس کو لیکر لوگ سوشل میڈیا پر اپنے غم و غصہ کا بھی اظہار کرتے نظر آ رہے ہیں۔