اتر پردیش کا کاشی ایک ایسا شہر جسے مندروں کا شہر بھی کہا جاتا ہے ، جہاں عقیدت مندوں اور دیوتاؤں کے تئیں الگ ہی عقیدت دیکھنے کو ملتی ہے۔
سردی سے اپنے آپ کو بچانے کے لئے عقیدت مند اپنے دیوتاؤں کو لحاف اور سویٹر سے سجا رہے ہیں۔وارانسی کے لوہٹیا ، کے پاس بڑا گنیش مندر جہاں ویگنہارٹا کی سجاوٹ میں لحاف کا استعمال کیا گیا ہے۔ عقیدت مندوں نے گنیش جی کو سردی اور سرد لہر سے بچانے کے لئے لحاف اور کمبل اوڑھائے ہیں۔
وہیں ایک عقیدت مند کا کہنا ہے کہ اس طرح کی سردی تو جنوری کے وسط میں پڑتی ہے، لیکن اس بار سردی بہت زیادہ پڑ رہی ہے۔ یہ ہمارا عقیدہ ہے کہ جب ہمیں گرمی محسوس ہوتی ہے تو ہمارے دیوتا کو بھی گرمی لگتی ہے۔ اسی لیے جب ہمیں سردی لگ رہی ہے تو دیوتا کو بھی ٹھنڈ لگ رہی ہے۔ ہم لوگوں نے انہیں لحاف اوڑھائی، سویٹر پہنایا اور وقتا فوقتا مندر کو گرم کرنے کے لیے ہیٹر اور الاؤ کا بھی استعمال کیا ہے۔
مندر کے مہنت ابھے دوبے کا کہنا ہے کہ جس طرح سے انسان کو ٹھنڈ لگتی ہے اسی طرح بابا بڑا گنیش کو بھی ٹھنڈ لگتی ہوگی۔ ان کا کہنا ہے کہ اس کے پیچھے عقدیت مندوں کا احساس ہے۔ اس مندر میں گرمیوں میں دیوتاوں کے لیے پنکھا، کولر اور ایئر کنڈیشن کا استعمال کیا جاتاہے، اسی طرح سردی میں لحاف کا استعمال ہوتا ہے۔ ان کا کہنا ہے کہ پہاڑوں پر زیادہ برف باری کے سبب میدانی علاقوں میں سردی زیادہ پڑ رہی ہے۔
اس بار بے وقت بڑھی سردی نے لوگوں کو کافی حیران اور پریشان کیا ہے۔ لوگ اس سردی کی وجہ کچھ دنوں پہلے ہوئی بارش کو بتارہے ہیں۔
