مرادآباد: بلاک پرمکھ پر بدعنوانی کا الزام

ریاست اتر پردیش کے ضلع مرادآباد کے تھانہ مونڈھا پانڈے علاقے کے سبھی بی ڈی سی ممبر اور گاؤں کے پردھانوں نے بی جے پی کے بلاک پرمکھ للت کوشک اور بی ڈی او پر بدعنوانی کا الزام عائد کرتے ہوئے جانچ کی مانگ کی۔

گاؤں کے پردھان اور بی ڈی سی ممبر آج کلکٹریٹ پر پہنچ کر بلاک پرمکھ للت کوشک اور بی ڈی او کے خلاف احتجاج کیا اور ان کے ذریعے کیے گئے بدعنوانی کی جانچ کا مطالبہ کیا۔

بی ڈی سی ممبر احسان علی نے بلاک پرمکھ اور بی ڈی او پر الزام عائد کرتے ہوئے کہا کہ 'سرکاری اسکولوں کی رنگائی پتائی اور مرمت کرنے کے لئے فرضی ٹینڈر نکال کر اس کی رقم غبن کرنا چاہتے ہیں۔'

انہوں نے بتایا کہ 'علاقے میں موجود سرکاری اسکولوں کی رنگائی پتائی اور مرمّت کا کام پہلے ہی پردھانوں اور بی ڈی سی کے ذریعہ ہو چکا ہے، جن کاموں کے لئے اسکول کا ٹینڈر نکالا گیا ہے وہ کام تو پہلے ہی کرایا جا چکا ہے۔ پردھانوں اور بی ٹی سی کے ذریعہ کام کرائے جانے کے بعد اب اسی کام کرائے جانے کے ٹینڈر کا کیا مطلب ہے۔'

احسان علی نے بتایا کہ 'بلاک پرمکھ لَلِت کوشِک کے خلاف پہلے سے ہی کورٹ میں اور کئی کیسز میں مقدمہ چل رہا ہے۔'

ساتھ ہی انہوں نے مطالبہ کیا کہ 'ہماری مانگ ہے کہ جو ٹینڈر نکالے گئے ہیں ان ٹینڈروں کی جانچ پڑتال ہو اس ٹینڈر کو کس نے نکالا ہے؟ کس نے اس کا اسٹیمیٹ بنایا ہے، ان سب باتوں کی جانچ ہونی چاہئے۔'