ریاست اترپردیش کے دارالحکومت لکھنؤ میں سماج وادی پارٹی (ایس پی) سربراہ اور سابق وزیراعلیٰ اکھلیش یادو نے عالمی وبا کوروناوائرس میں مقابلہ جاتی امتحانات کے انعقاد کے حکومت کے فیصلے کو غیر موزوں قرار دیتے ہوئے کہا کہ حکومت کو طلبہ کے صحت کی پرواہ نہیں ہے۔
ساتھ ہی انہوں نے مطالبہ کیا کہ حکومت کو جے ای ای اور نیٹ امتحانات میں شرکت کرنے والے امیدواروں کے لیے ٹرانسپورٹ کے ساتھ قیام وطعام کا انتظام کرنا چاہیے۔
بی جے پی کے خلاف کھلے خط میں مسٹر یادو نے جمعرات کو لکھا کی بی جے پی کی طرف سے مذاق پر مبنی اور بے بنیاد باتیں پھیلائی جارہی ہیں کہ جب لوگ دیگر کاموں سے گھر سے باہر نکل رہے ہیں تو امتحانات کیوں نہیں دے سکتے۔
انہوں نے کہا کہ ایسی باتیں کہنے والوں کو پتہ ہونا چاہیے کہ لوگ مجبوری میں گھروں کے باہر نکل رہے ہیں، جبکہ حکومت امتحان کے نام پر انہیں گھروں سے باہر نکلنے پر مجبور کررہی ہے۔