لکھنؤ: اگلے سال ہونے والے لوک سبھا انتخابات کے پیش نظر سماج وادی پارٹی کے صدر اکھلیش یادو نے کارکنوں سے اتحاد قائم رکھنے کی اپیل کرتے ہوئے جمعرات کو کہا کہ بوتھ سطح پر جمہوریت کو بچانے کے لحاظ سے یہ انتخابات آنے والی نسل اور ملک کا مستقبل طے کریں گے۔
پارٹی ہیڈکوارٹر میں بڑی تعداد میں ایس پی کارکنوں سے خطاب کرتے ہوئے یادو نے کہا کہ اب پارٹی میں کوئی دھڑے بندی نہیں رہے گی۔ کارکن اس بار غلطی نہ کریں۔ جمہوریت کو بوتھ کی سطح پر بچانا ہوگا۔ لوک سبھا انتخابات کو بہت سنجیدگی سے لڑنا ہوگا اور جیتنا ہوگا۔ 2024 میں ہونے والے انتخابات آنے والی نسل اور ملک کے مستقبل کا فیصلہ کرنے والے ثابت ہوں گے۔ سماج وادی پارٹی اتر پردیش میں بی جے پی کو شکست دے کر عوام کی امیدوں پر پورا اترے گی۔
انہوں نے کہا کہ ایس پی کے پاس مستقبل کا وژن اور ترقی کا ماڈل ہے۔ ترقی کے جو معیار سوشلسٹ حکومت میں طے کیے گئے وہ ’’سوشلسٹ ماڈل‘‘ ہے جس کے ذریعے عوامی فلاحی ریاست کی تعمیر ہوتی ہے۔ عوام سماج وادی پارٹی پر صرف اپنے خوابوں کو پورا کرنے کی صلاحیت پر بھروسہ کرتے ہیں۔
ایس پی صدر نے کارکنوں پر زور دیا کہ وہ یکجہتی، وفاداری اور ایمانداری کے ساتھ بوتھوں کو مضبوط کرنے کے لیے ابھی سے کام شروع کر دیں۔ کارکنوں کو متنبہ کرتے ہوئے انہوں نے کہا کہ اس بار لوک سبھا انتخابات میں کوئی غلطی نہیں ہونی چاہئے۔ 2022 کے اسمبلی انتخابات میں، لوگ ایس پی کی حکومت بنانا چاہتے تھے، انہوں نے سماج وادی حکومت بنانے کے لیے پارٹی کے امیدواروں کو زبردست ووٹ دیا، لیکن بی جے پی نے طاقت کا غلط استعمال کیا، جھوٹ، فریب اور طاقت کے ذریعے نتائج کو متاثر کیا۔
یادو نے کہا کہ آج سماج وادی حکومت کی صرف ترقیاتی اسکیمیں نظر آرہی ہیں اور لوگوں کو ان کا فائدہ مل رہا ہے۔ بی جے پی نے صرف مسائل پیدا کیے ہیں۔ مہنگائی، بے روزگاری اپنے عروج پر ہے۔ ہر طبقہ فکر مند ہے۔ کسان، نوجوان، مزدور سب اپنی بقا کی جدوجہد کر رہے ہیں۔ بی جے پی حکومت نے چھ سالوں میں مفاد عامہ کی کوئی اسکیم نہیں چلائی۔ ریاست میں ترقیاتی کام ٹھپ ہو کر رہ گئے ہیں۔ طبی اور صحت کی خدمات تباہ ہو چکی ہیں۔ ہسپتالوں میں مریضوں کو نارمل علاج بھی نہیں مل رہا۔ قتل و غارت کھلے عام ہو رہی ہے۔ چاروں طرف افراتفری ہے۔ غریبوں کے ساتھ ناانصافی ہو رہی ہے۔ کسی کو انصاف نہیں مل رہا۔
انہوں نے کہا کہ سماج وادی پارٹی آئین اور جمہوریت کو بچانے کے لیے آئندہ 2024 کے لوک سبھا انتخابات میں بی جے پی کو اقتدار سے اکھاڑ پھینکنے کا کام کرے گی۔ پارٹی کارکن بی جے پی کو اقتدار سے ہٹانے کے لیے متحد اور پرعزم ہیں۔
یواین آئی۔
