بریلی میں سڑک حادثہ، چار ہلاک

ضلع بریلی سے کلیر شریف جا رہے چار دوستوں کی سڑک حادثہ میں موت ہو گئی۔

ریاست اتر پردیش کے ضلع بریلی کے چار دوستوں کی ضلع بجنور کے نہٹور علاقے میں سڑک حادثہ میں دردناک موت ہو گئی۔ یہ چاروں دوست اتراکھنڈ کے ضلع ہریدوار میں واقع کلیر شریف جا رہے تھے۔ اس حادثہ میں ایک دوست شدید زخمی ہے، جسے نجی ہسپتال میں داخل کرایا گیا ہے۔

سڑک حادثے میں چاروں کے ہلاک ہونے کی اطلاع پر پنچھی پولیس نے چاروں کی لاش کو کار سے باہر نکالا۔ انہیں مورچری میں رکھا گیا ہے۔ بریلی میں بارہ دری علاقے کے ربڑی ٹولہ دادو کواں کے رہنے والے ببلو اپنے دوست ربڑی ٹولہ کے ہی رہنے والے تنویر، راجو، چھوٹو اور افتخار کے ساتھ ایک دن قبل ہی کلیر شریف جانے کے لیے نکلے تھے۔

دراصل بجنور کے نزدیک نہٹور علاقے میں ان کی گاڑی کا ٹائر پھٹ گیا جس سے گاڑی بےقابو ہوکر سڑک کنارے کھائی میں گرکر پلٹ گئی۔ حادثہ میں تنویر، راجو، چھوٹو اور افتخار کی موقع پر ہی موت ہو گئی، جبکہ ببلو شدید زخمی ہو گیا۔ ببلو نے اسکی اطلاع پولیس کو دی۔

تھانہ انچارج نہٹور نے بتایا کہ 'پولس نے پہلے کھائی سے گاڑی کو باہر نکالنے کی کوشش کی، لیکن جب گاڑی باہر نہیں نکلی تو گاڑی کو کاٹ کر ان چاروں کی لاشوں کو باہر نکالا گیا۔ چاروں دوستوں کی موت کی اطلاع ملنے کے بعد اہل خانہ بجنور کے لیے روانہ ہو گئے ہیں۔