کنویں سے نکالے گئے شخص کو کسی بھی قسم کی طبی امداد کے لئے ہسپتال منتقل نہیں کیا گیا بلکہ تڑپنے کے لئے وہیں چھوڑ دیا گیا۔
تفصیلات کے مطابق بارہ بنکی ریلوے اسٹیشن کے سامنے ایک قدیم کنواں ہے جس پر لوگ گرمی سے بچنے کے لئے بیٹھتے ہیں ۔ کنواں آدھا بند ہے اور آدھا کھلا ہوا ہے۔
ایک شخص اتفاقی طور پر کنویں میں گرگیا۔ لوگوں نے اس بات کی اطلاع فائیر بریگیڈ کو دی۔ فائیر بریگیڈ نے بغیر کسی تحقیق کے ایک غیر تربیت یافتہ شخص کو رسی کی مدد سے کنویں میں اتاردیا۔
جس شخص کو کنویں میں اتارا گیا نہ ہی اسے کسی قسم کی تربیت حاصل تھی اور نہ ہی فائیر بریگیڈ کے پاس کوئی پیشہ وارانہ ساز و سامان موجود تھا۔
اس بارے میں جب فائیر برگیڈ کے اہلکاروں سے بات کی گئی تو اور بھی حیران کن انکشاف ہوئے۔ فائیر بریگیڈ ملازم رام ملن پرجاپتی نے بتایا کہ جب بھی کوئی گرتا ہے تو اسی نوجوان کو اتارا جاتا ہے۔ صرف اتنا ہی نہیں بلکہ وہ اپنے ذاتی کام بھی عام لوگوں سے کرواتے ہیں۔
اس معاملہ میں فائیر بریگیڈ کی بے حسی میں دیکھنے میں آئی کہ کنویں میں گرے ہوئے شخص کو نکال تو لیا مگر اسے ہسپتال نہیں لے جایا گیا بلکہ وہیں تڑپتا ہوا چھوڑ کر چلے گئے۔