اترپردیش : تصادم میں انعامی بدمعاش گرفتار

اترپردیش کے ضلع باغپت کے سنگھ والی اہیر علاقے میں اتوار کو ہوئے پولیس تصادم میں 25 ہزار کا انعامی بدمعاش زخمی ہو گیا‘ جسے گرفتار کر لیا گیا ہے۔ جبکہ اس کا ساتھی فرار ہو گیا۔

پولیس افسر ابھیشیک سنگھ نے یہ اطلاع دی۔ انہوں نے بتایا کہ آج دوپہر کے وقت سنگھ والی اہیر تھانہ حلقے کے انچارج شیوپرکاش پولیس فورس کے ساتھ علاقے میں تلاشی مہم پر تھی۔ اسی دوران سَیڈبھر راستے پر ڈاک بنگلہ کے پاس موٹر سائیکل سوار مشتبہ دو افراد کو پولیس نے رکنے کا اشارہ کیا۔ وہ رکنے کے بجائے تیزی سے بھاگنے لگے۔

پولیس نے ان کا پیچھا کرکے جب انہیں پکڑنے کی کوشش کی تو ان افراد نے پولیس پر فائرنگ کر دی۔ پولیس نے بھی جوابی کاروائی کرتے ہوئے فائرنگ کی جس میں ایک بدمعامش زخمی ہو گیا۔ جبکہ اس کا ساتھی فرار ہو گیا۔

انہوں نے بتایا کہ زخمی بدمعاش بدوس کا باشندہ تھا۔ اس کے قبضے سے ایک طمنچہ اور کارتوس کے علاوہ چوری کی بائک برآمد کی گئی ہے۔ زخمی شان محمد کو اسپتال میں داخل کرایا گیا ہے۔

انہوں نے مزید بتایا کہ شان شاطر قسم کا مجرم ہے۔ یہ دو روز قبل تیڈا گاؤں کے جنگل میں نہر پٹری پر ہوئے تصادم میں اس کے ساتھی ظہیر کو گرفتار کیا گیا تھا اور یہ موقع سے فرار ہو گیا تھا۔