لوگ پیدل یا سائیکل سے گھر جانے پر مجبور

قومی دارالحکومت دہلی اور این سی آر کے علاقوں سے لاک ڈاؤن کے دوران کمپنیوں میں کام کرنے والے ملازمین اپنے آبائی وطن سائیکل کے ذریعہ جانے پر مجبور ہیں۔

اپنے آبائی وطن جانے والوں کے لئے حکومت نے بسوں کا انتظام تو کر دیا ہے لیکن وہ کافی نہیں ہے، بسوں میں گنجائش سے زیادہ بھیڑ ہے، لوگوں کو زبردستی ان میں ٹھونسا جا رہا ہے، عوام بسوں کی چھت پر بھی بیٹھ کر جانے کو مجبور ہے اور اسی لئے لوگ پیدل یا سائیکل سے گھر جانے کو تیار ہیں۔

گڑگاؤں کی ایک پرائیویٹ کمپنی میں کام کرنے والے تین ملازمین نے سائیکل سے ہی اپنے گھر ضلع قنوج جانے کا فیصلہ کیا ہے۔ وہ آج علی گڑھ پہنچ چکے ہیں اگر یہاں سے اِنھیں کوئی بس ملتی ہے تو وہ اس کے ذریعہ قنوج جائیں گے۔

گڑگاؤں سے ضلع قنوج جانے والے گووند سنگھ نے بتایا کہ 'ہم گڑگاؤں سے آرہے ہیں اور ہمیں قنوج جانا ہے'۔

واضح رہے کہ گووند سنگھ دہلی کی ایک نجی کمپنی میں بر سر روزگار تھے لیکن لاک ڈاؤن کے سبب انھیں یہ ملازمت چھوڑنی پڑی اور اب وہ کھانے پینے اور رہنے کی تکلیف کے سبب اپنے آبائی وطن لوٹنے کو مجبور ہوگئے ہیں۔

انہوں نے بتایا کہ یہاں سے اگر ہمیں کوئی بس مل گئی اور سائیکل رکھنے کی اجازت بھی مل گئی تو بس جائیں گے۔