ریاست اتر پردیش کے ضلع بارہ بنکی میں بی جے پی اقلیتی مورچہ نے محمد عامر خان کو ضلع کا نیا صدر منتخب کیا ہے۔ محمد عامر خان نے اس کے لئے ریاستی قیادت کا شکریہ ادا کیا اور مسلمانوں کو پارٹی سے جوڑنے کو اپنا ترجیحی ایجنڈا بتایا۔
بارہ بنکی میں بی جے پی دفتر پر اپنے استقبال کے بعد انہوں نے کہا کہ 'ریاستی قیادت نے انہیں جو ذمہ داری دی ہے اس پر کھرا اترنے کی پوری کوشش کریں گے اور پارٹی سے مسلمانوں کو جوڑنے کے لئے وہ کام کریں گے۔ '
عامر نے دعویٰ کیا کہ 'ضلع کے 67 فیصدی مسلمانوں کو حکومتی اسکیمات کا فائیدہ حاصل ہوا ہے۔ انہیں گھر، مفت راشن، اقلیتوں کی لڑکیوں کی شادی کے لئے دی جانے والی رقم کو دوگنا کیا گیا ہے۔ ان سب کاموں سے مسلمانوں کا رجحان بی جے پی کی جانب بڑھا ہے۔'
یہ بھی پڑھیں: کورونا وائرس کی تباہی سے یوگی حکومت نے کوئی سبق نہیں لیا: پرینگا
انہوں نے کہا کہ 'سابق ضلع صدر نے جو تنظیمی ڈھانچہ تیار کیا ہے اس کو اور مضبوط کرتے ہوئے مسلم نوجوانوں کو بی جے پی سے جوڑا جائے گا اور جس طرح لوک سبھا انتخابات میں حیدرگڑھ علاقے میں بی جے پی کو 30 فیصد مسلم ووٹ حاصل ہوا تھا اس میں اور اضافہ ہوگا۔'