ریاست اترپردیش میں گزشتہ دنوں بجلی کے دام میں اضافی کردیا گیا ہے جس کے سبب عام لوگوں کا بجٹ بھی کافی متاثر ہوا ہے۔
وزیراعطم کے پارلیمانی حلقے وارانسی میں محکمۂ بجلی کی لاپرواہی کے سبب ایک نجی اسکول کو تقریباً 6 ارب 18 کروڑ 51 لاکھ روپئے کا بجلی بل بھیجا گیا ہے۔
اس تعلق سے اسکول کے کو-آرڈینیٹر یوگیندر مشرا نے بتایا کہ جب انھوں نے یہ بجلی بل دیکھا تو انھیں اس بات پر یقین ہی نہیں ہوا، انھوں نے اسے کئی بار الٹ پلٹ کر دیکھا اور کئی لوگوں سے پوچھا کہ واقعی یہ بل چھ ارب روپے کا ہے؟
حالانکہ انھوں نے بجلی محکمہ سے اس بات کی شکایت کی تھی لیکن افسران نے یہ کہہ کر اپنا پلہ جھاڑ لیا کہ سافٹ ویئر میں گڑبڑی ہونے کے سبب یہ معاملہ پیش آیا ہے اور اتنا کہہ کر انھیں روانہ کردیا گیا۔
یوگیندر کا مزید کہنا ہے کہ وہ گزشتہ کئی دنوں سے محکمۂ بجلی کے دفتر کا چکر کاٹ رہے ہیں لیکن انھیں صرف یقین دہانی کرائی جارہی ہے، جب کہ انھیں 25 اگست کو یہ بل موصول ہوا ہے اور اگر انھوں سے سات ستمبر سے قبل بل کی ادائیگی نہیں کی تو اسکول کا بجلی کنکشن کاٹ دیا جائے گا۔