بنارس کے غوطہ خوروں کی زندگی مشکل میں

ہندوؤں کے قدیم مذہبی شہر بنارس کے راج گھاٹ علاقے میں سینکڑوں جھگی جھونپڑیوں میں آباد افراد دریائے گنگا سے نقدی رقم نکالتے ہیں، جس سے ان کے گھروں کا چولہا جلتا ہے، لیکن ٹرینیں اور موٹرگاڑیوں کی معطلی سے ان غوطہ خوروں کے لیے آمدنی کا ذریعہ بند ہو گیا ہے۔

راج گھاٹ علاقے میں دریائے گنگا کے اوپر تعمیر پرانے پل سے ٹرین اور موٹر گاڑیوں کا گزرگاہ ہے۔ ہندو عقیدت مند ٹرینوں اور موٹر گاڑیوں سے بطور نذرانہ گنگا ندی میں پیسے پھینکتے ہیں۔

جسے پرانے پل کے اطراف میں آباد ہزاروں افراد اپنی جان کوخطرے میں ڈال کر ندی میں دفن خزانے کو تلاش کرتے ہیں، لیکن کورونا وائرس کی وجہ سے لاک ڈاؤن ہوا اور سبھی ٹرینیں معطل کردی گئیں، اس وقت سے ایک بڑی آبادی کی زندگی مشکل میں پڑگئی ہے۔

گنگا ندی سے معمولی رقم تلاش کرکے اپنے گھر کا خرچ اٹھانے والے نوجوانوں کے اہل خانہ سخت آزمائش سے گزر رہے ہیں، نہ کھانے کا بندوبست ہے اور نہ ہی سرمایہ ۔

لاک ڈاؤن کو دو ہفتے سے زائد ایام گزرنے کو ہیں لیکن اب تک حکومت کے ذریعے جاری کردہ امداد ان لوگوں تک نہیں پہنچی ہے ایسے میں ان لوگوں کو فقط سماجی کارکنان کے آس کے علاوہ کوئی دوسرا سہارا نہیں ہے۔