لاک ڈاؤن کے دوران حکومت کی جانب سے غریبوں کو مفت راشن تقسیم کرنے کی اسکیم الجھ کر رہ گئی ہے۔
دہلی کے وزیر اعلی اروند کیجریوال نے کہا تھا کہ جن کے پاس راشن کارڈ نہیں ہے انہیں حکومت لاک ڈاؤن کے دوران مفت راشن دے گی۔ لیکن دو روز قبل تک تقسیم کرنے کے لیے حکومت کے پاس راشن نہیں تھا۔
اب راشن کافی مقدار میں ہے، لیکن حکومت کی جانب سے رکھی گئی شرائط کی وجہ سے لوگوں کو اس کا کوئی فائدہ نہیں مل پا رہا ہے۔
لاک ڈاؤن کے دوران لوگ کسی طرح مفت راشن لینے مرکز پر پہنچ جاتے ہیں لیکن دستاویز نہیں ہونے کی وجہ سے انہیں خالی ہاتھ لوٹنا پڑتا ہے کیوں کہ راشن لینے کے لیے ان کے پاس 'ای پاس' نہیں ہوتا۔
دراصل حکومت نے بنا راشن کارڈ والوں کو راشن کارڈ دینے کے لیے اصول بنائے ہیں، اس کے مطابق راشن لینے والے کے پاس آدھار کارڈ ہونا ضروری ہے، آدھار کارڈ کے ذریعے وہ دہلی حکومت کے فوڈ اینڈ سپلائی محکمہ کی ویب سائٹ پر جاکر وہاں تفصیلات بھریں گے۔
اس کے بعد انہیں ایک ای پاس جاری کیا جائے گا۔ اس ای پاس اور آدھار کارڈ کو لے کر جب وہ راشن سنٹر جائیں گے تو انہیں ہر فرد کے حساب سے پانچ کلو راشن دیا جائے گا۔ جس میں 4 کلو گیہوں اور ایک کلو چاول ہے۔
لوگوں کا کہنا ہے کہ وہ پاس لینے گئے تھے لیکن ویب سائٹ ٹھپ تھی اس لیے پاس نہیں مل سکا۔ کچھ لوگوں کا کہنا ہے کہ لاک ڈاؤن میں سائبر کیفے بند ہیں۔