سخت سکیورٹی میں رکھی گئی کورونا ویکسین

سہارنپور ضلع میں بھی کورونا ویکسین پہنچ چکی ہے۔ جس کا کچھ حصہ شاملی اور مظفرنگر اضلاع میں بھی پہنچایا جائے گا اور 16 تاریخ بروز ہفتہ سے یہ ویکسین لگنی شروع ہوجائے گی۔

اتر پردیش کے سہارنپور میں دو ڈرائی رن کے کامیاب انعقاد کے بعد اب محکمہ صحت کورونا کی ٹیکہ کاری کی تیاریوں میں مصروف ہے۔ مراکز پر سبھی ضروری انتظامات کر لئے گئے ہیں۔ آج کورونا ویکسین میرٹھ سے سہارنپور سخت حفاظتی انتظام کے ساتھ پہنچ چکی ہے۔ کورونا ویکسین کے 36650 ڈوز ضلع اسپتال میں رکھے جائیں گے، جن میں سے 14620 مظفرنگر اور 5130 شاملی میں بھیجے جائیں گے۔

ریاست اترپردیش میں 16 تاریخ سے کورونا ویکسین کا ٹیکہ لگانے کا کام شروع کیا جائے گا۔ پولیس کی سخت سکیورٹی اور سی سی ٹی وی کی نگرانی میں ویکسین رکھی گئی ہے۔

تفصیل کے مطابق کورونا وائرس کے بعد اب ویکسین کا انتظار تقریباً ختم ہو چکا ہے اور سہارنپور ضلع میں آج ویکسین آچکی ہے جو 16 تاریخ سے لوگوں کو لگائی جائے گی۔

واضح رہے کہ گزشتہ سال مارچ مہینے سے کورونا وائرس نے پوری دنیا میں تباہی مچائی اور پوری دنیا کے سائنس داں کورونا ویکسین تیار کرنے میں لگے ہوئے تھے لیکن بھارت کے اندر ویکسین بن کر تیار ہوچکی ہے۔ جس کا 16 تاریخ سے پورے ملک میں ویکسی نیشن ہونا ہے۔

مرکزی حکومت کی جانب سے بھارت کی ہر ریاست میں ویکسین بھیجی جارہی ہے، اسی تناظر میں اترپردیش کے سہارنپور ضلع میں بھی ویکسین پہنچ چکی ہے۔جس کا کچھ حصہ شاملی اور مظفرنگر اضلاع میں بھی پہنچایا جائے گا اور 16 تاریخ سے یہ ویکسین لگنی شروع ہوجائے گی۔

ضلع میں سرکاری اور پرائیویٹ محکمہ صحت کے ملازمین کو کورونا ویکسین لگانے کی تیاری تیز ہوگئی ہیں۔

اس سلسلہ میں سی ایم او ڈاکٹر بی ایس سوڈھی نے بتایا کہ ویکسین کو متعینہ درجہ حرارت پر رکھا گیا ہے۔ ٹیکہ لگانے والے مراکز پر تین کمرے بنائے گئے ہیں، پہلا ویٹنگ روم ہوگا، جہاں ٹیکہ لگوانے والے لوگو ں کو بٹھایا جائے گا، دوسرے ویکسینیشن روم میں ٹیکہ لگایا جائے گا۔ تیسرے روم میں ٹیکہ لگانے والوں کو 30منٹ تک رکھا جائے گا۔

کووڈ ناڈل آفیسر شوانگا گوڑ نے بتایا کہ کورونا ویکسین رکھنے کے لئے کولڈ چین بنایا گیا ہے۔ اس میں مائنس 2 ڈگری سیلسیس سے 8 ڈگری سیلسیس پر کورونا ویکسین کو اسٹور کے ڈی فریج میں رکھا جائے گا۔

انہوں نے کہا کہ ٹیکہ لگانے کے دوران ماسک اور سوشل ڈسٹینسنگ پر عمل کیا جائے گا۔ کورونا کے ٹیکے لگانے کے لئے محکمہ صحت نے 24 اسپتالوں کی نشاندہی کی ہے، ان میں 11 اسپتالوں میں پہلے روز محکمہ صحت کے ملازمین کو کورونا کی ویکسین لگائی جائے گی۔

انہوں نے مزید بتایا کہ محکمہ صحت کی جانب سے ٹیمیں تشکیل کردی گئی ہیں، جو اس ویکسین کو لگائے گی۔