رامپور میں سرکاری ہسپتالوں مراکز پر ضابطہ اخلاق کے خلاف ورزی

ریاست اترپردیش کے شہر رامپور میں قائم ایک شہری ابتدائی صحتی مرکز پر لگے وزیر اعلی یوگی آدتیہ ناتھ کی تصویر والے پوسٹرس ملک میں نافذ ضابطہ اخلاق کی کھلی خلاف ورزی کرتے نظر آئے۔

ایک طرف ضلع انتظامیہ کا کہنا ہے کہ قانون سب کے لئے برابر ہے اور دوسری جانب ضلع انتظامیہ کی نگرانی میں چلنے والا یہ ابتدائی طبی مرکز خود ہی ضابطہ اخلاق کی کھلے عام خلاف ورزی کر رہا تھا۔

عام انتخابات کی تاریخوں کے اعلان کے ساتھ ہی پورے ملک میں ضابطہ اخلاق بھی نافذ ہو گیا ہے۔ اس کے پیش نظر تمام عوامی مقامات گلی، محلوں، چوراہوں اور چھوٹی بڑی شاہراہوں سے لیکر سرکاری دفاتر اور سینٹرس پر سے سیاسی جماعتوں اور ان کے لیڈروں کی تصاویر والے ہورڈنگز اور پوسٹرز یا کسی بھی قسم کا کوئی اشتہار ہی کیوں نہ ہو، ہٹانا شروع کر دیے گئے تھے۔ اس کے باوجود رامپور کے بلاسپور گیٹ علاقے میں قائم ایک ابتدائی صحتی مرکز پر ابھی تک وزیر اعلی یوگی آدتیہ ناتھ کی تصویر والے پوسٹرس ہسپتال کے اندر دیواروں پر چسپاں تھے۔
ای ٹی وی بھارت کے نمائندے نے اس بابت ہسپتال کے انتظامیہ کو ضابطہ اخلاق کی یاددہانی کراتے ہوئے ان کو ہٹانے کے لئے کہا۔
جس پر انہوں نے فوری یقین دہانی کرائی اور اسی وقت ہٹانے کا وعدہ کر لیا۔
لیکن آج اس ہسپتال میں جب دوبارہ جانا ہوا تو یہ دیکھ کر تعجب ہوا کہ وہ پوسٹرس جوں کے توں چسپاں ہیں۔
ای ٹی وی بھارت نے جب اس پر انہیں توجہ دلائی اور ان سے اس تعلق سے رائے جاننا چاہا تو انہوں نے بجائے اس پر صفائی دینے پوسٹرز ہٹانے شروع کر دیے۔