بریلی: کورونا سے حفاظت کے لئے خواتین کا بڑا کارنامہ

اترپردیش کے ضلع بریلی میں خواتین کے گروپ نے ایک پی پی ای کِٹ تیار کی ہے۔ اس کِٹ کو ضلع کے اعلیٰ افسران کے سامنے پیش بھی کیا جا چکا ہے۔ افسران نے اس کِٹ کو اتر پردیش حکومت کے پاس بھیجنے کی تیاری کر لی ہے۔ حکومت سے منظوری ملنے کے بعد اس کِٹ کو عوام کے لیئے دستیاب کر دیا جائےگا۔

کورونا وائرس کے خلاف جنگ میں پی پی ای کٹ (پرسنل پروٹیکٹو ایکیوپمنٹ) کی کمی سے مشکلات پیش آرہی ہے ۔ ایسے میں ضلع بریلی کے بِتھری چینپور بلاک میں ”ویمن سیلف ہیلپ گروپ“ یعنی ڈبلو ایس ایچ جی نے پی پی ای کِٹ تیار کی ہے۔ خواتین کے گروپ نے اس کِٹ کو ضلع ترقّی آفیسر یعنی سی ڈی او کے سامنے پیش کیا۔ اور اسکی باریکیوں سے بھی واقف کرایا ہے۔ اب سی ڈی او اس کِٹ کو حکومت کے پاس منظوری کے لیئے بھیجینگے۔ حکومت اور حکمران کے امتحان میں پاس ہونے کے بعد خواتین کے گروپ کو اسے تیار کرنے کا آرڈر دیا جائےگا۔

گزشتہ دنوں حکومت نے لکھیم پور کے خواتین گروپ کی تیارکردہ پی پی ای کٹ کو منظوری دی تھی۔ بریلی میں این آر ایل ایم کے تحت کام کرنے والے بتھری چینپور کے گاؤں فریدہ پور عنایت خان کے ”گلاب ویمن سیلف ہیلپ گروپ“ نے پی پی ای کٹ تیار کی ہے۔ پی پی ای کٹ کے معیار سے افسران بھی مطمئن ہیں۔ تاہم، کٹ کے معیار سے متعلق حتمی فیصلہ حکومت کو کرنا ہے۔ خواتین کے گروپ نے پی پی ای کِٹ کا سیمپل ضلع ترقّی آفیسر ”سی ڈی او“ اور پروجیکٹ ڈائریکٹر ”پی ڈی“ کے سامنے پیش کیا ہے۔ حالانکہ پی پی ای کِٹ کی قیمت کو لیکر ابھی کوئ فیصلہ نہیں ہوا ہے۔ بہرحال خواتین گروپ کی سربراہ کے مطابق اس کٹ کو تیار کرنے میں دو سو ساٹھ روپیہ کی لاگت آئ ہے۔ گلاب گروپ اس کٹ کو اسی قیمت میں عوام کو مہیا کرانے کے لیئے تیار ہے۔”گلاب ویمن سیلف ہیلپ گروپ“ ایک دن میں تقرباً ایک سو پی پی ای کٹ بنانے کے لئے تیار ہے۔ اسی خواتین گروپ کا گاؤں میں بڑے پیمانے پر سلائی کا کام ہے۔ خواتین کے گروپ نے ابھی کچھ مہینے قبل پرائمری اسکولوں میں بچّوں کی ڈریس بنانے میں اہم کردار ادا کیا ہے۔