یوگی کے خلاف بیان پر بی جے پی کارکنان میں ناراضگی

شوشل میڈیا پر وزیر اعلیٰ اتر پردیش یوگی آدتیہ ناتھ کے خلاف نازیبا بیان بازی کرنے پر بی جے پی کارکنان اور ہندو یوا واہنی کے کارکنان میں زبردست ناراضگی ہے۔

کارکنان نے ایس ایس پی سہارنپور سے ملاقات کرکے واہٹس ایپ پر وزیر اعلیٰ کے خلاف نازیبا بیان بازی کرنے والے محمد کمال خان کے خلاف کارروائی کا مطالبہ کیا۔ پولیس نے مذکورہ شخص کے خلاف مقدمہ قائم کرکے آگے کی کارروائی شروع کر دی ہے۔

تفصیل کے مطابق آنے والے 23 دسمبر کو وزیر اعلیٰ اتر پردیش یوگی آدتیہ ناتھ کا سہارنپور میں ممکنہ دورہ ہے۔ وزیر اعلیٰ کے اوپر شوشل میڈیا پر نازیبا بیان بازی کی جا رہی ہے۔

وزیراعلیٰ کے اوپر شوشل میڈیا میں نازیبا بیان بازی کے بعد ضلع سہارنپور کے بی جے پی کارکنان اور ہندو یوا واہنی کے کارکنان نے سخت ناراضگی کا اظہار کرتے ہوئے ایس ایس پی ڈاکٹر ایس چننپا سے ملاقات کی اور وزیر اعلیٰ کے خلاف نازیبا بیان بازی کرنے والے شخص کے خلاف سخت کارروائی کامطالبہ کیا۔

واہٹس ایپ گروپ پر وزیر اعلیٰ پر نازیبا بیان بازی کرنے والا شخص تھانہ منڈی علاقے کا رہنے والا بتایا جا رہا ہے۔ اس سلسلہ میں بی جے پی کے سابق اسمبلی رکن راجیو گمبر نے بتایا کہ گذشتہ ایک ہفتے سے ایک پوسٹ شوشل میڈیا پر وائرل ہو رہی ہے، جس میں ایک شخص جس کا نام محمد کمال خان ہے، اس کے ذریعہ یوگی آدتیہ ناتھ پر نازیبا بیان بازی کی گئی ہے جسے کسی قیمت پر برداشت نہیں کیا جائے گا۔

انہوں نے بتایا کہ اسی مسئلہ کو لیکر آج کارکنان نے ایس ایس پی سہارنپور ڈاکٹر ایس چننپا سے ملاقات کی اور اس شخص کے خلاف سخت سے سخت کارروائی کا مطالبہ کیا۔