بی جے پی بھیم آرمی کو بدنام کرنے کی سازش کر رہی ہے: کمل سنگھ والیا

ہاتھرس معاملہ میں بھیم آرمی پر لگے فنڈنگ کے الزامات پر بھیم آرمی کے قومی جنرل سکریٹری کمل سنگھ والیا نے بی جے پی حکومت پر تنقید کرتے ہوئے کہا 'بی جے پی حکومت خواتین کی عزت بچانے میں ناکام ثابت ہوئی اور اپنی ناکامی چھپانے کے لیے بھیم آرمی پر الزامات عائد کئے جارہے ہیں۔

ہاتھرس کیس میں بھیم آرمی پر پی ایف آئی سے فنڈنگ ہونے کے الزام اور ہاتھرس میں فساد کو بھڑکانے کی سازش کا الزام لگایا گیا تھا۔

اس پر بھیم آرمی کے بانی چندرشیکھر آزاد اور قومی جنرل سکریٹری کمل سنگھ والیا نے بی جے پی حکومت پر تنقید کرتے ہوئے کہا کہ 'جن لوگوں کو ہمارے اکاؤنٹ کی جانچ کرنی ہے کرلے اگر ہمارے اکاؤنٹ میں 1 لاکھ روپے بھی مل جائیں تو ہم استعفیٰ دے دیں گے، اگر نہ ملے تو یوگی جی کو اپنے عہدے سے استعفیٰ دینا ہوگا۔

کمل سنگھ والیا نے کہا کہ 'بی جے پی حکومت اپنی ناکامیوں کو چھپانے کے لیے بھیم آرمی کو نشانہ بنارہی ہے۔ انہوں نے کہا کہ بی جے پی کی حکومت میں خواتین محفوظ نہیں ہیں۔ بھیم آرمی کسی کے کہنے پر نہیں رکے گی اور نہ ہی ڈرے گی۔ ہم انصاف کے لیے آگے رہے گے۔