بلرامپور: ایک ہی کنبے کے پانچ افراد کورونا سے متاثر

اترپردیش کے ضلع بلرامپور میں مجموعی متاثرین کی تعداد بڑھ کر 136 ہوگئی ہے۔

اترپردیش کے ضلع بلرامپور میں 11 افراد کی کورونا جانچ رپورٹ مثبت آئی ہے جس میں پانچ افراد ایک ہی کنبے کے ہیں۔ ضلع میں مجموعی متاثرین کی تعداد بڑھ کر 136ہوگئی ہے۔

چیف میڈیکل افسر ڈاکٹر گھنشیام سنگھ نے پیر کو بتایا کہ آج موصول رپورٹ میں 11 افراد میں کورونا وائرس کی تصدیق ہوئی ہے جن میں سے سسئی گاؤں میں ایک ہی کنبے کے پانچ افراد شامل ہیں۔ انہوں نے بتایا کہ سبھی مریضوں کو ضلع کے لیول 1 اسپتال میں داخل کرایا گیا ہے۔ کل متاثرین میں سے 99 مریض شفایاب ہوکر اپنے گھروں کو جاچکے ہیں جبکہ اس وقت 34 مریضوں کا علاج چل رہا ہے۔

انہوں نے بتایا کہ ضلع سے اب تک 15352 افراد کے نمونے جانچ کے لئے بھیجے جاچکے ہیں۔ ان میں سے 14417کی رپورٹ موصول ہوچکی ہے ۔تین کورونا متاثرین کی موت ہوئی ہے۔