زرعی قوانین کی واپسی تک تحریک جاری رہے گی: ٹکیت

ملک میں زرعی قوانین کے خلاف کسانوں کی جاری تحریک کے درمیان بھارتی کسان یونین کے ترجمان راکیش ٹکیت آج ریاست اترپردیش کے رامپور پہنچے۔ جہاں انہوں نے رامپور کے ٹول پلازہ پر احتجاجی مظاہرے میں بیٹھے ہوئے کسانوں سے ملاقات کی۔ اس دوران انہوں نے ای ٹی وی بھارت سے اپنی خصوصی بات چیت میں کہا کہ جب تک حکومت زراعت سے متعلق تینوں کالے قوانین کو واپس نہیں لے لیتی تب تک کسانوں کی تحریک اسی طرح جاری رہے گی۔

مرکزی حکومت کے زراعت سے متعلق تینوں متنازع قوانین کسانوں کی تحریک کو اب آٹھ ماہ مکمل ہو چکے ہیں۔ لیکن نہ تو ایک قدم حکومت ہی پیچھے ہٹی ہے اور نہ ہی ملک کے کسان پیچھے ہٹتے دکھائی دے رہے ہیں۔

کسانوں کی تحریک کو مزید تقویت دینے کے مقصد سے آج بھارتیہ کسان یونین کے رہنما راکیش ٹکیت رامپور پہنچے۔ رامپور کے ٹول پلازہ پر گذشتہ ایک ماہ سے دھرنے پر بیٹھے کسانوں نے اپنے رہنما راکیش ٹکیت کا پرتپاک استقبال کیا اور ان کی حمایت میں زبردست نعرے بازی کی۔

وہیں، انہوں نے مرکزی حکومت کے نئے زرعی قوانین کے خلاف بھی نعرے بازی کرتے ہوئے ان قوانین کو واپس لینے کی اپنے مطالبات کو دہرایا۔

اس دوران ای ٹی وی بھارت سے اپنی خصوصی بات چیت میں راکیش ٹکیت نے کہا کہ جب تک حکومت ان تینوں کالے قوانین کو واپس نہیں لے لیتی تب تک ان کی تحریک اسی طرح جاری رہے گی۔

انہوں نے کہا کہ وہ رامپور دورے پر پہنچے ہیں۔ کسانوں کے حالات کو جاننے کی کوشش کر رہے ہیں اور زرعی قوانین کے خلاف آئندہ تحریک کو کس طرح جاری رکھا جائے اس پر غوروخوص کر رہے ہیں۔

ایک سوال کے جواب میں راکیش ٹکیت نے یہ بھی کہا کہ ان کی تحریک کمزور نہیں پڑی ہے۔ انہوں نے کہا کہ سیاسی پارٹیوں کے مظاہرے عموماً یک روزہ ہوا کرتے ہیں جبکہ کسانوں کی یہ تحریک گذشتہ آٹھ ماہ سے جاری ہے اور آئندہ بھی جاری رہے گی۔