نکاح کی اہمیت اور ہمارا سماج کے موضوع پر لیکچر

ریاست اترپردیش کے شہر رامپور میں آج ایک سماجی تنظیم کی جانب سے نکاح کی اہمیت اور سماج کے موضوع پر لیکچر کا اہتمام کیا گیا۔ جس میں نکاح کے اہم مسائل اور سماج میں نکاح کے تعلق سے پائی جانے والی غلط رسم و رواج پر گفتگو کی گئی۔ اس پروگرام سے حاضرین نے سوال و جواب کے ذریعہ بھی استعفادہ حاصل کیا۔

نکاح کے نام پر سماج میں پھیلی غلط رسم و رواج سے لوگوں کو بیدار کرنے کے مقصد آج ریاست اتر پردیش کے رامپور کے جے کے پیلیس میں نکاح اور ہمارا سماج کے موضوع پر لیکچر کا اہتمام کیا گیا۔

اس موقع پر معروف عالم دین مولانا قمرالزماں حفیظ اللہ نے نکاح کی اہمیت پر اپنے لیکچر میں قرآن و سنت کا حوالہ دیکر کہا کہ سب سے اچھی شادی وہ ہے جس میں سب کم خرچ ہو۔

انہوں نے کہا کہ آج ہمارے سماج میں نام و نمود کے لئے شادیاں کافی اخراجات والی ہونے لگی ہیں۔ جس سے غریب طبقہ پر اس کا کافی منفی اثر پڑ رہا ہے۔ انہوں نے کہا کہ اللہ کے رسول نے فرمایا تھا کہ 'زنا کو مشکل اور شادی کو آسان بناؤ' لیکن لاعلمی کی بنا پر ہمارے سماج کی بے جا رسم و رواج نے آج شادیوں کو مشکل اور زنا کو آسان کر دیا ہے۔

انہوں نے کہا کہ ضرورت اس بات کی ہے کہ ہم قرآن و سنت کے مطابق ہی اپنی شادی کی تقریبات کا اہتمام کریں۔ لیکچر کے بعد سوال و جواب کا بھی سیشن چلا۔ اس پروگرام میں معروف اسکالر ڈاکٹر انیس نے بھی خطاب کیا۔ اس خصوصی پروگرام کا اہتمام پیس فار ہیومینٹی کی جانب سے کیا گیا۔