اتر پردیش کے بارہ بنکی ضلع کے رام سنیہی گھاٹ تحصیل کے احاطے میں واقع مسجد غریب نواز کو مسمار کرکے اس پر پارک کا سنگ بنیاد رکھنے سے ایک خاص طبقہ کے افراد میں خاصہ غصہ نظر آ رہا ہے۔
شہر کے محرم کمیٹی نے بھی اس کی مذمت کی ہے۔ محرم کمیٹی نے واضح طور پر الزام عائد کیا ہے کہ انتظامیہ میں بیٹھے کچھ لوگ ضلع کی گنگا جمنی تہذیب کو نقصان پہنچانے کا کام کر رہے ہیں۔
بارہ بنکی شہر کمیٹی کے صدر تاج بابا راعین نے سوال اٹھایا کہ جب حکومت نے مسجد مسمار کی کارروائی کے لیے جانچ کمیٹی تشکیل کر رکھی ہے۔ تو آنن فانن میں کیا ضرورت ہو گئی کہ مسجد کی جگہ پر پارک کا سنگ بنیاد رکھ دیا گیا ہے۔ انہوں نے کہا کہ اس کارروائی سے ایک خاص طبقے کے لوگوں کے جذبات کو ٹھیس پہنچی ہے۔
انہوں نے مزید کہا کہ بارہ بنکی دیوا اور مہادیوا کی سرزمین ہے۔ یہاں کی گنگا جمنی تہذیب کو انتظامیہ کے کچھ لوگ خراب کرنا چاہ رہے ہیں۔
انہوں نے مطالبہ کیا ہے کہ اس جگہ سے پارک کے سنگ بنیاد کو فورآ ہٹایا جائے اور مسجد کی تعمیر نو کی جائے۔