پولیس ٹیم پر حملہ، 30 افراد حراست میں

ریاست اترپردیش کے ضلع وارانسی کے جنسا علاقے میں بدمعاشوں کو پکڑنے گئی پولیس ٹیم پر مقامی افراد نے حملہ کردیا جس میں کم سے کم چھ پولیس اہلکار زخمی ہوگئے۔

اس معاملے میں پولیس نے تقریباً 30 افراد کو حراست میں لے لیا ہے اور ان سے پوچھ گچھ کررہی ہے۔

پولیس ذرائع نے بتایا کہ 'کرائم برانچ کی ایک ٹیم کی اطلاع کی بنیاد پر پیر کی رات جنسا علاقے کے ہرشاس گاؤں میں مطلوب چل رہے راجن بھاردواج اور راہل بھاردواج کو پکڑ لیا۔ دونوں ملزموں کو چھڑانے کے لئے بدمعاشوں کے حمایتی گاؤں کے لوگوں نے کئی پولیس اہلکاروں کو پکڑ کر ان پر حملہ کردیا۔'

حادثے کی اطلاع ملتے ہی پولیس کے اعلی افسران روہنیا سمیت کئی مقامات کی پولیس کے ساتھ موقع پر پہنچ گئے۔ اسی درمیان ان کے ساتھ پرتشدد جھڑپیں ہوئیں۔

الزام ہے کہ بھیڑ نے پولیس پر اینٹ، پتھروں سے حملہ کیا جس سے پی ترپاٹھی سمیت کم سے کم چھ پولیس اہلکار زخمی ہوگئے۔

بتایا جاتا ہے کہ کئی پولیس اہلکار کو پکڑ کر مقامی افراد نے ان کے ساتھ مارپیٹ کی اور ان کے پستول چھین لیے۔

انہوں نے بتایا کہ 'زخمی پولیس اہلکار کا علاج بنارس ہندو یونیورسٹی(بی ایچ یو) کے ٹراما سنٹر میں چل رہا ہے۔ سینئر سپرنٹنڈنٹ آف پولیس آنند کلکرنی نے حالات کا جائزہ لیا اور فوری کاروائی کرتے ہوئے تقریباً 30 افراد کو حراست میں لیا گیا ہے۔ حراست میں لئے گئے افراد سے پوچھ گچھ کی جارہی ہے۔'