جونپور: تبیلہ میں آتشزدگی، 16 مویشی ہلاک

اترپردیش کے ضلع جونپور کے جلال پور علاقہ میں ایک مویشی تبیلے میں آگ لگ گئی۔ اس آتشزدگی میں 16 مویشی ہلاک جبکہ 18 مویشی جھلس گئے۔

پولیس ذرائع نے یہاں بتایا کہ جلال پور علاقہ کے نہورا (دلپٹی) گاؤں باشندہ کامتا پرساد یادو کا سئی ندی پل کے نزدیک ذاتی تبیلہ ہے۔ جس میں گائے بھینس ملا کر تقریبا 150 مویشی تھے۔ اچانک تبیلہ کے چھپر میں آگ لگ گئی اور دیکھتے ہی دیکھتے آگ نے بھیانک شکل اختیار کرلیا۔

انہوں نے بتایا کہ آتشزدگی کے بعد کامتا پرساد نے شور مچایا تو آس پاس کے گھروں میں سو رہے ان کے بیٹے دلیپ کمار اور کملیش کمار یادو اٹھ کر آئے اور مویشیوں کو کھول کر باہر نکالنے لگے۔ آگ کی لہریں اتنی تیز تھیں کہ اس کی زد میں آکر 16 مویشیوں کی موت ہوگئی جبکہ 18 مویشی جھلس گئیں۔

اطلاع ملنے پر ڈائل 112 پولیس کے علاوہ مقامی افراد موقع پر پہنچے۔ آتشزدگی کی وجوہات کا پتہ نہیں چل سکا ہے۔