ریاست اترپردیش کے ضلع علی گڑھ میں سماجوادی پارٹی کے رہنماوں اور کارکنان نے مختلف مقامات دفاتر اور اپنے مکان سے علی گڑھ تحصیل تک سائیکل ریلی نکالی۔
سائیکل ریلی میں ضلع علی گڑھ کے ماج وادی پارٹی کے تمام سینئر رہنماوں کے علاوہ سابق رکن اسمبلی اور کارکنان شامل تھے جنہوں نے ملک کی موجودہ صورتحال کے علاوہ مرکزی اور ریاستی حکومت کی ناکامی کے خلاف نعرے بازی کرتے ہوئے اعظم خاں کی رہائی کا بھی مطالبہ کیا۔
سماج وادی پارٹی کے رہنماوں کا کہنا ہے کہ موجودہ حکومت پوری طرح سے ناکام ہو گئی ہے۔ انتخابات سے قبل جو وعدے کیے گئے تھے، ان میں سے کوئی بھی وعدہ پورا نہیں کیا گیا۔ ملک میں مہنگائی آسمان کو چھو رہی ہے اور بے روزگاری سے سبب نوجوان پریشان ہیں۔ موجودہ حکومت صرف نفرت کی سیاست کر رہی ہے۔
علی گڑھ کے سابق رکن اسمبلی اور علی گڑھ لنک لاکس کے مالک محمد ظفر عالم بتایا سائیکل ریلی نہ صرف ضلع علی گڑھ میں بلکہ ریاست کے مختلف مقامات سے نکالی جارہی ہے۔
انہوں نے کہا کہ اس ریلی کا مقصد موجودہ حکومت کے ذریعہ جو سیاسی ماحول قائم کیا گیا ہے، اسے تبدیل کرنا ہے۔ انہوں نے کہا کہ ایسا لگتا ہے کہ ملک کا دستور موجودہ حکومت کی نظر میں کوئی معنی نہیں رکھتا۔
ظفر عالم نے مزید کہا پورے پانچ سال میں حکومت نے قانون کی دھجیاں اڑائی ہیں۔ کسی کو انکم ٹیکس سے ڈرایا، کسی کو ای ڈی سے ڈرایا اور کسی کے خلاف غداری کا مقدمہ درج کیا۔ جب بھی کوئی آواز موجودہ حکومت کے خلاف اٹھتی ہے تو کسی نہ کسی طرح سے اس کو ڈرا کر اس کی آواز کو عوام تک نہیں پہنچنے دیتے۔
علی گڑھ مسلم یونیورسٹی کے طلبہ رہنما اور سماج وادی پارٹی کے لیڈر انضمام الحق نے کہا کہ موجودہ حکومت نے عوام سے انتخابات سے پہلے جووعدے کئے تھے انہیں پورا نہیں کیا گیا ہے۔
انہوں نے کہا کہ موجودہ حکومت پوری طرح سے ناکام ہوچکی ہے۔