کہیں پینے کا پانی نہیں، کہیں نالوں میں بہہ رہا ہے پانی

ریاست اتر پردیش کے ضلع علی گڑھ تھانہ سول لائن زوہرہ باغ کے علاقے میں پینے کے پانی کی پائپ لائن پھٹ جانے سے مسلسل پانی بہہ رہا ہے جس کی وجہ سے علاقے میں پانی بھر گیا ہے اور لوگوں کے پاس پینے کا پانی نہیں ہے۔

ایک طرف تو حکومت کی جانب سے پانی بچانے کی مہم چلائی جارہی ہے اور سرکاری محکموں میں لوگوں کو پانی کی اہمیت کے بارے میں بتایا جا رہا ہے دوسری جانب خود میونسپل کارپوریشن کی پینے کی پائپ لائن سے پانی بہہ رہا ہے۔

واضح رہے کہ علیگڑھ کے ہی متعدد علاقوں میں پینے کے پانی کی کافی قلت ہے جہاں میونسپل کارپوریشن اور حکومت پینے تک کے پانی کو مہیا نہیں کرا پا رہی ہے۔

مقامی لوگوں کا کہنا ہے کہ' جیو کمیونیکیشن کے تار زیر زمین نصب کرتے وقت پینے کے پانی کی بڑی پائپ لائن پھٹ گئی تھی جس سے زیر زمین تار ڈالنے کا کام تو روک دیا گیا لیکن تب سے مستقل پینے کا پانی بہہ رہا ہے جس سے علاقے میں پینے کے پانی کی کمی ہوگئی ہے۔

مقامی لوگوں نے کئی بار شہری انتظامیہ سے اس کی شکایت کی لیکن اس جانب کسی نے بھی توجہ نہیں دی اور اب علاقے میں آنے جانے کا راستہ بند ہوگیا ہے یہاں تک کہ کھودے گئے دس فٹ گہرے گھڑے میں پانی بھر گیا ہے۔

گزشتہ شب ایک پانچ سال کا بچہ دس فٹ گہرے پانی کے گڑھے میں ڈوب گیا موقعے پر موجود لوگوں نے نظر پڑتے ہی اسے بچا کر ایک بڑا حادثہ ہونے سے روکا۔

مقامی لوگوں کے مطابق جس دن سے پائپ لائن پھوٹی ہے اس دن سے جیو کی گڑھا کھودنے والی ٹیم بھی غائب ہے علاقے میں تقریبا دس سے زائد جگہوں پر گڑھے کھودے ہیں۔

مقامی افراد نے جب شہری انتطامیہ کو اس کے بارے میں جانکاری دی اور ان سے کام کر رہی ٹیم اور ٹھیکیدار کا نمبر مانگا تو انتظامیہ نے نمبر دینے سے بھی انکار کردیا۔

مقامی لوگوں کا مطالبہ ہے کہ ان گڑھوں کو جلد سے جلد بند کر کے پائپ لائن درست کی جائے تاکہ پینے کے پانی کو محفوظ کیا جاسکے۔